გუშინ გივიკომ „ფეისბუქის“ ხელმომწერებს ამცნო, რომ ნათკა ბებომ ფეხი მოიტეხა და მკურნალობის კურსს საავადმყოფოში გადის. ბებო თავს სუსტად გრძნობს და ჯერ ფეხზე დადგომა არ შეუძლია.
გივიკომ ბებიასთან სევდიანი საუბარი ვიდეოზე გადაიღო და სოციალურ ქსელში ატვირთა. ვიდეოს ათასობით ადამიანი გამოეხმაურა და ბებიას ჯანმრთელობა უსურვა.
„ნათი, მომეცი ახლა პირობა, რომ მოძლიერდები და ფეხზე დადგები. შენ თუ ფეხზე დადგები, წვერსაც გევიპარსავ და ცოლსაც მევიყვან, ამას გპირდები. ნათი, შენ რომ გინდა, იმფერი გოგოა“, – მიმართავს შვილიშვილი ბებიას.
აქვე გეტყვით, რომ უკვე წლებია გივიკო წვერს ატარებს, რასაც ბებია დღემდე ვერ შეეგუა. შვილიშვილს ძირითად ამ მიზეზით აკრიტიკებს და ხშირად ეჩხუბება კიდეც. ბევრჯერ ჩუმად გაპარსვითაც დაემუქრა შვილიშვილს. გივიკოს ცოლის მოყვანა კი უკვე დიდი ხანია ბებიას „სადარდებლად“ იქცა.
ჩვენთან ერთ-ერთი ინტერვიუს დროს გივიკომ აღნიშნა, რომ ძალიან განიცდის ბებიას წლების მატებას.
გასულ წელს ნათკა ბებომ მოსიყვარულე შვილი დაკარგა, გივიკომ – მზრუნველი მამა. მას შემდეგ გურული ქალის თვალებში ის ხალისი და ცეცხლი გაქრა, რაც მანამდე ჰქონდა. თუმცა გივიკო მაინც ახერხებს საყვარელ ბებიას წუთით მაინც დაავიწყოს დიდი ტკივილი და გააღიმოს ის.