თბილისი, 17 აგვისტო - Sputnik. 18 აგვისტოდან საქართველოს ეროვნული უნივერსიტეტის (სეუ) ტერიტორიაზე (წინანდლის N9) მასობრივი ვაქცინაციის ცენტრი გაიხსნება, იუწყება ჯანდაცვის სამინისტრო.
ვაქცინაციის ცენტრი ყოველ დღე, დასვენების დღეების ჩათვლით 10:00-დან 18:00 საათამდე იმუშავებს და ვაქცინაცია შესაძლებელი იქნება Pfizer, Sinovac და Sinopharm-ის ვაქცინებით.
უწყების ცნობით, კორონავირუსის საწინააღმდეგო აცრისთვის წინასწარი რეგისტრაციის გავლა საჭირო არ არის.
დღემდე საქართველოში მასობრივი ვაქცინაციის 8 ცენტრი ფუნქციონირებდა.
აღნიშნულ ლოკაციებამდე მუნიციპალური ტრანსპორტის მუშაობის შეზღუდვის პირობებში სპეციალურ ავტობუსებს მოქალაქეები შვიდი მარშრუტით გადაჰყავთ.
საქართველოში მასობრივი ვაქცინაცია 5 ივლისს დაიწყო.
დაავადებათა კონტროლის ცენტრის ინფორმაციით, 16 აგვისტოს მონაცემებით, საქართველოში 16 აგვისტოს აიცრა 25.083 პირი. 17 აგვისტოს დილის მონაცემებით, საქართველოში სულ 831.815 აცრა ჩატარდა, აქედან ორჯერადად აცრილია 245.207 ადამიანი.
ქვეყანა კორონავირუსის მეოთხე ტალღას ებრძვის. ინფიცირების შემთხვევების ყოველდღიური მაჩვენებელი ძალზე მაღალია. ყველაზე მძიმე საქართველოში კორონავირუსის მეორე ტალღა იყო 2020 წლის შემოდგომაზე. მაშინ ინფიცირების ყოველდღიური მაჩვენებელი 4–5 ათასი იყო. ამჟამად ინფიცირების ყოველდღიურმა მაჩვენებელმა უკვე გადააჭარბა მეორე ტალღის დროს არსებულ საშუალო მონაცემებს.