თბილისი, 16 აგვისტო — Sputnik. ჭიათურის რაიონის სოფელ მანდაეთში მცხოვრები საქართველოში ყველაზე ხანდაზმული წყვილი – ნოე მუმლაძე და მარო ციცვიძე-მუმლაძე საკუთარ სახლში გაჩენილ ხანძარს ემსხვერპლნენ. ამის შესახებ დაწერა ჭიათურის მერმა გივი მოდებაძემ თავის Facebook-გვერდზე.
გასულ ზამთარს ნოე და მარიამი Sputnik-საქართველოს ვიდეოსიუჟეტის გმირები გახდნენ. 2020 წელს მათ 100 წელი შეუსრულდათ. მეუღლეები დაიბადნენ ერთ დღეს – 1 იანვარს, ერთ სოფელში გაიზარდნენ და ერთად 76 წელი იცხოვრეს.
მარადიული სიყვარული: საოცარი ასწლიანი ისტორია საქართველოდან
© video: Sputnik / Vladimir Umikashvili / Anna Anastasiadi
„ქალბატონ მაროს და ბატონ ნოეს ხშირად ვსტუმრობდი და ყოველთვის სიამოვნებით ვისმენდი მათი სიყვარულის და თანაცხოვრების ისტორიას. ერთ დღეს დაიბადნენ და ერთ დღეს აღესრულნენ. თანავუგრძნობ გარდაცვლილების ოჯახს, ახლობლებს და ყველას, ვინც ამ კეთილშობილ მოხუცებს იცნობდა და გულშემატკივრობდა“, – დაწერა მოდებაძემ.
ნოესა და მაროს 5 შვილი, 11 შვილიშვილი და 15 შვილთაშვილი ჰყავთ. ახლა ყველა მათგანი საქართველოს სხვადასხვა ქალაქებში ცხოვრობს, თავად ნოემ და მარიამმა კი მშობლიურ სოფელში დარჩენა ამჯობინეს.
ყველაზე უფროსი შვილი 73 წლისაა, უმცროსი – 64 წლის.