თბილისი, 12 აგვისტო – Sputnik. ბათუმში მდებარე ორი სარიტუალო დარბაზი იზოლაციისა და კარანტინის წესების განმეორებით დარღვევის გამო დილუქა, ნათქვამია შსს-ს მიერ გავრცელებულ განცხადებაში.
როგორც გამოძიებით დადგინდა, სარიტუალო დარბაზები „ერა“ და „დავითი“ პირველ ჯერზე 10 ათასი ლარით დაჯარიმდნენ, თუმცა ისინი კვლავ განაგრძობდნენ აკრძალულ ეკონომიკურ საქმიანობას, რის საფუძველზეც მათ მიმართ გამოძიება დაიწყო სსკ-ის 248-ე პრიმა მუხლით და აღნიშნული ობიექტები დაილუქა.
ქვეყანაში შექმნილი ეპიდვითარების გამო საქართველოში ქორწილის, ქელეხის, იუბილესა და მსგავსი ღონისძიებების გამართვაზე კონტროლი გამკაცრდა. კვების ობიექტები მსგავსი ღონისძიებების გამართვის შემთხვევაში 10 ათასი ლარით დაჯარიმდებიან, ხოლო ფაქტის გამეორების შემთხვევაში ობიექტი დაილუქება.
საქართველოში რესტორნების მუშაობა გასული წლის 28 ნოემბრიდან აიკრძალა, თუმცა შემდეგ შეზღუდვების ეტაპობრივი შემსუბუქების პროცესი დაიწყო. 15 თებერვლიდან რესტორნებს ღია სივრცეში საქმიანობის განახლების უფლება მისცეს, 8 მარტიდან მათ სტუმრების დახურულ სივრცეში მიღების უფლებაც დართეს, მხოლოდ არა უქმეებზე. 19 მარტიდან რესტორნებში „ცოცხალი მუსიკაც“ დაუშვეს.
22 მაისიდან კაფე–რესტორნებს უქმეებზეც დართეს მუშაობის ნება, თუმცა ღია სივრცეში. 1 ივნისიდან აღნიშნული შეზღუდვაც მოიხსნა.
კვების ობიექტების მუშაობა 24:00 საათიდან 05:00 საათამდე პერიოდში აკრძალულია.