თბილისი, 11 აგვისტო – Sputnik. მეხანძრე-მაშველებმა კასპის მუნიციპალიტეტის სოფელ გოსტიბედან დაკარგული 66 წლის ქალი იპოვეს. ინფორმაციას შინაგან საქმეთა სამინისტროს საგანგებო სიტუაციების მართვის სამსახური ავრცელებს.
უწყების ცნობით, ქალი 7 აგვისტოს, სავარაუდოდ, ტყის მიმართულებით გავიდა, რის შემდეგაც ოჯახის წევრებმა მისი კვალი დაკარგეს. რამდენიმედღიანი საძიებო სამუშაოების შედეგად სახანძრო-სამაშველო ჯგუფებმა გაუჩინარებული ქალბატონის ადგილსამყოფელს მიაგნეს და ის უსაფრთხო ადგილზე გამოიყვანეს.
უწყებაში აცხადებენ, რომ ქალის სიცოცხლეს და ჯანმრთელობას საფრთხე არ ემუქრება. სახანძრო-სამაშველო ოპერაციაში მონაწილეობას იღებდა შიდა ქართლის მთავარი სამმართველოს სამაშველო ჯგუფი ყველა აუცილებელი აღჭურვილობით. ძებნის პროცესში ასევე ჩართული იყო საფრენი აპარატი დრონი.