თბილისი, 11 აგვისტო — Sputnik. ეგვიპტის ხელისუფლება მიმდინარე წლის 1 ნოემბრიდან ოთხ- და ხუთვარსკვლავიან ოტელებში მინიმალური ფასის დადგენას გეგმავს, რათა მაღალი ხარისხის სერვისი გარანტირებული იყოს, განაცხადა პრესკონფერენციაზე ქვეყნის ტურიზმის მინისტრმა ჰალედ ალ-ანანიმ.
„ხუთვარსკვლავიან ოტელებში მინიმალური ფასი კაცზე 40 დოლარი იქნება, ოთხვარსკვლავიანებში — 28 დოლარი. ეს აღმოფხვრის ოტელიერებს შორის არალეგალურ კონკურენციას, რომლებიც ფასს აკლებენ, თუმცა ტურისტებს არასაკმარისად კარგ სერვისს სთავაზობენ. ჩვენ ორი თვის წინ დავიწყეთ ოტელებში კომისიების დაგზავნა, რომლებიც სერვისის დონესა და მის ვარსკვლავებთან შესაბამისობას ამოწმებენ“, — აღნიშნა მინისტრმა.
ალ-ანანის თქმით, მთავრობა ეხმარება ტურისტულ ბიზნესს აღდგენაში და საგადასახადო და სხვა ტიპის შეღავათებს სთავაზობს მათაც და ავიაკომპანიებსაც.
კერძოდ, სამოქალაქო ავიაციის სამინისტრომ აეროპორტებში თვითმფრინავების მომსახურების ფასები 20-50%-ით შეამცირა, საწვავის ღირებულება კი ყოველ დოლარზე 15 ცენტით დაბლა დასწია.
მინისტრის თქმით, ეს ფასდაკლებები 2022 წლის აპრილამდე იმოქმედებს, რაც ეგვიპტეში მეტ უცხოელ ტურისტს მიიზიდავს.