თბილისი, 10 აგვისტო – Sputnik. მმართველმა პარტია „ქართული ოცნება – დემოკრატიულმა საქართველომ“ მიიღო გადაწყვეტილება, კორონავირუსის საწინააღმდეგო ვაქცინაცია ჩაუტაროს პარტიის ყველა წევრს, რომელიც მმართველ გუნდს ცესკოში წარმოადგენს, ასევე თავის მომხრეებს რეგიონებში. ამის შესახებ პარტიის აღმასრულებელმა მდივანმა მამუკა მდინარაძემ განაცხადა.
საქართველოში 2 ოქტომბერს ადგილობრივი თვითმმართველობის არჩევნები ჩატარდება. ქვეყანაში რთული ეპიდემიოლოგიური ვითარების გამო ცესკომ თავისი თანამშრომლების აცრის გადაწყვეტილება მიიღო, ასევე წარმოადგინა არჩევნებისთვის უსაფრთხოების ზომების ჩამონათვალი.
„ქართული ოცნება - დემოკრატიული საქართველო“ იღებს ვალდებულებას, რომ მისი წარმომადგენლები ცენტრალურ, საოლქო, თუ საუბნო საარჩევნო კომისიებში, პარტიის სახელით არჩევნებში აქტიურად ჩართული ადამიანები მაქსიმალურად იქნებიან ვაქცინირებული და განუხრელად დაიცავენ კოვიდ-რეგულაციებს“, – განაცხადა მდინარაძემ.
მისი თქმით, ასევე პარტიის ყველა საარჩევნო შტაბი კორონავირუსის საწინააღმდეგო ვაქცინაციის ჩატარების მსურველებს რეგისტრაციაში დაეხმარება.
საქართველოში მასობრივი ვაქცინაცია 5 ივლისს დაიწყო, ამჟამად ქვეყანაში სულ მხოლოდ 664.997 აცრაა ჩატარებული, მათგან ორჯერადად 204.234 ადამიანია აცრილი.
ვაქცინაცია შესაძლებელია ან წინასწარი რეგისტრაციის გავლით სპეციალურ ვებ-გვერდზე, ან ვაქცინაციის ცენტრებში „ცოცხალი რიგის“ წესით.