თბილისი, 24 ივლისი - Sputnik. ქართველმა ჩოგბურთელმა ნიკოლოზ ბასილაშვილმა ტოკიოს ოლიმპიური თამაშები გამარჯვებით დაიწყო.
საქართველოს პირველმა ჩოგანმა პირველ ეტაპზე ესპანელი რობერტო კარბალეს ბაენა მარტივად ორ სეტში დაამარცხა. ბასილაშვილმა პირველი სეტი ერთი ბრეიკით, ანგარიშით 6:3 მოიგო, ხოლო მეორე სეტში ქართველმა ჩოგბურთელმა მეტოქეს უკვე ორი ჩაწოდება წაართვა და საბოლოო ანგარიში (6:3, 6:2) დააფიქსირა.
29 წლის ქართველი სპორტსმენი შემდეგ ეტაპზე (1/16) მასპინძელ ტარო დანიელსა და იტალიელ ლორენცო სონეგოს შორის გამარჯვებულს შეხვდება.
აღსანიშნავია, რომ ნიკოლოზ ბასილაშვილი ოლიმპიადაზე საქართველოს სახელით მოასპარეზე ერთადერთი ჩოგბურთელია.
რიგით 32-ე ზაფხულის ოლიმპიურ თამაშებზე საქართველოდან სპორტის 11 სახეობაში 35 სპორტსმენი ასპარეზობს.