თბილისი, 19 ივლისი – Sputnik. ლგბტ–საზოგადოების მოწინააღმდეგეებმა ბათუმის სასტუმროსთან Sheraton Batumi, სადაც ევროპული საბჭოს პრეზიდენტი შარლ მიშელი ოპოზიციის ლიდერებს შეხვდა, საპროტესტო აქცია მოაწყვეს.
შეკრებილებს ხელში ეჭირათ პლაკატები მიშელისადმი მიმართვით: „რატომ ისჯება „ალტ–ინფო“ და არ ისჯება „მთავარი“, „TV პირველი“, „ფორმულა“?! „ერი. ოჯახი. რელიგია – ესაა ჩვენი ღირებულებანი, თქვენი როგორია, მიშელ?“ „საქართველოში მხოლოდ სამხედრო აღლუმები ჩატარდება“.
სასტუმროსთან პოლიცია იყო მობილიზებული.
ევროპული კავშირის პრეზიდენტი შარლ მიშელი ბათუმში კვირას ჩავიდა. ის მონაწილეობას მიიღებს ყოველწლიურ საერთაშორისო კონფერენციაში „ევროკავშირის მიზიდულობის ძალა და რეგიონის ტრანსფორმაცია“. კონფერენციაში ასევე მონაწილეობენ უკრაინის პრეზიდენტი ვლადიმირ ზელენსკი და მოლდოვის პრეზიდენტი მაია სანდუ.
კონფერენციის მთავარი თემა იქნება ევროკავშირის სამ ასოცირებულ პარტნიორს – საქართველოს, მოლდოვასა და უკრაინას შორის თანამშრომლობის დონის ამაღლება. ეს სამი ქვეყანა ცოტა ხნის წინ ოფიციალურად გაფორმდა, როგორც ასოცირებული ტრიო.
მხარეები განიხილავენ ევროკავშირის შესაძლო ინტერესებს სამ აღმოსავლეთევროპელ პარტნიორთან გაფართოებული ინტეგრაციის პროცესში შემდგომ მონაწილეობაში.
შარლ მიშელმა უკვე გამართა შეხვედრა საქართველოს პრეზიდენტ სალომე ზურაბიშვილთან, პრემიერ-მინისტრ ირაკლი ღარიბაშვილთან, ოპოზიციის ლიდერებთან.
თბილისში 16 ივლისს პოლიციაში გამოკითხვაზე დაიბარეს არასამთავრობო ორგანიზაციების ლიდერები და მღვდელმსახურები, რომლებიც ლგბტ–საზოგადოების წინააღმდეგ გამოდიან. ესენი არიან დეკანოზი სპირიდონ ცქიფურიშვილი, მოძრაობის „ალტერნატივა საქართველოსთვის“ დამფუძნებელი კონსტანტინე მორგოშია, საზოგადოებრივი მოძრაობა „ზნეობის“ ლიდერები გურამ და ალექსანდრე ფალავანდიშვილები, საინფორმაციო პლატფორმა „ალტ–ინფოს“ წევრები, ჯგუფი „ქართული იდეის" ლიდერი ლევან ჩაჩუა. მათ დაუსვეს კითხვები თბილისში 5–6 ივლისს განვითარებულ მოვლენებზე, როდესაც მასმედიის 53 წარმომადგენელი სცემეს, დაარბიეს არასამთავრობო ორგანიზაციების „თბილისი პრაიდისა“ და „სირცხვილიას“ ოფისები.
გამოკითხვამდე ლგბტ–თემის წინააღმდეგ კონტრაქციის ორგანიზატორების სახლებსა და ოფისებში ჩხრეკა ჩაატარეს. კონტრაქციის ორგანიზატორები არ დაუკავებიათ.