თბილისი, 16 ივლისი - Sputnik. ზაფხულის ბანაკები აიკრძალა - საქართველოს მთავრობამ „იზოლაციისა და კარანტინის წესების დამტკიცების შესახებ" დადგენილებაში ცვლილებები შეიტანა.
დადგენილებაში ასევე შევიდა რიგი ცვლილებები, კერძოდ, ტრენინგებზე, კონფერენციებსა და სემინარებზე მონაწილეობისთვის აუცილებელია PCR-ტესტის უარყოფითი პასუხის წარდგენა.
გარდა ამისა, 18 წლამდე ასაკის მოზარდების სპორტული ტურნირებისა და სასწავლო-საწვრთნელი შეკრებების ჩატარება დასაშვებია მხოლოდ ყველა მონაწილის წინასწარი PCR-ტესტირების საფუძველზე.
დადგენილება ძალაში 2021 წლის 19 ივლისიდან შევა.
როგორც ადრე ჯანდაცვის სამინისტროში განაცხადეს, კორონავირუსით ინფიცირების მზარდი შემთხვევების გამო, შესაძლოა, ქვეყანაში გარკვეული შეზღუდვები კვლავ დაწესდეს. უწყებაში არ გამორიცხეს, რომ ბავშვებში ინფიცირების შემთხვევების მატების გამო, შეზღუდვები შეიძლება საზაფხულო ბანაკებსაც შეეხოს. სპეციალისტების განმარტებით, მსგავსი აქტივობა ბავშვებსა და მოზარდებში კორონავირუსის გავრცელების ერთგვარად ხელშემწყობი შეიძლება გახდეს.