თბილისი, 8 ივლისი – Sputnik. სამგორისა და ვარკეთილის რაიონების დაახლოებით 8,5 ათასი აბონენტი 8 და 9 ივლისს გაზის გარეშე დარჩება. ამის მიზეზი გაზსადენის რეკონსტრუქციაა, ნათქვამია გაზგამანაწილებელი კომპანია „თბილისი ენერჯის“ (Tbilisi Energy) განცხადებაში.
კომპანიის ინფორმაციით, გაზის მიწოდება შეწყდება 8 ივლისის 21:00 საათიდან და თანდათანობით აღდგება 9 ივლისის 10:00 საათიდან.
გაზის გარეშე დარჩებიან ჯავახეთის ქუჩის მოსახლეობის ნაწილი, აეროპორტის დასახლების ნაწილი, ვარკეთილის მესამე მასივის მოსახლეობა, ასევე მეტრო „ვარკეთილთან“ მცხოვრებთა ნაწილი.
გაზი არ მიეწოდებათ ასევე მაღაზიებს, სამედიცინო ცენტრებს, პოლიციის შენობებს, ნავთობისა და გაზის კორპორაციას, სავაჭრო ცენტრებს, აფთიაქებს, ბაზრებს, სკოლებსა და საბავშვო ბაღებს.
ქუჩების სრული ჩამონათვალი კომპანიის ვებ-გვერდზეა გამოქვეყნებული.