თბილისი, 7 ივლისი – Sputnik. მთავრობის კანცელარიის შენობასთან მასმედიის წარმომადგენლებმა ჟურნალისტებზე ძალადობის წინააღმდეგ საპროტესტო აქცია გამართეს.
აქციის მონაწილეებმა მთავრობას მომხდარ ძალადობაზე პასუხისმგებლობის აღებისა და ყველა დამნაშავის დასჯისკენ მოუწოდეს.
ტელეკომპანია „TV პირველის“ ტელეწამყვან თორნიკე კვერენჩხილაძეს მიაჩნია, რომ სწორედ პრემიერ-მინისტრის მიერ 5 ივლისის დილით გაკეთებულ განცხადებას მოჰყვა რუსთაველის გამზირზე ძალადობრივი პროცესები.
„დღეს აქ ბევრი ადამიანი უნდა ყოფილიყო, მაგრამ ზოგიერთი ამ დრომდე საავადმყოფოშია, ზოგი კი 5 ივლისს მიღებული შოკიდან ჯერ ვერ გამოვიდა. ასე გაგრძელება არ შეიძლება!.. ადამიანებს უნდა ესმოდეთ, რომ კანონი კანონია და არ შეიძლება ჟურნალისტების წინააღმდეგ ისე მოქმედება, როგორც ისინი იქცევიან“, – განაცხადა კვერენჩხილაძემ.
თბილისის ცენტრში ლგბტ–თემის მოწინააღმდეგეები, რომლებიც საკუთარ თავს „ტრადიციული ფასეულობების მცველებს“ უწოდებენ, ორი დღის მანძილზე განსაკუთრებული აგრესიით იქცეოდენ.
ორშაბათსა და სამშაბათს გამართულ კონტრაქციებზე მათ ჟურნალისტებზე ნადირობა გამოაცხადეს. შსს-ს ცნობით, თავდასხმების შედეგად ძალადობის მსხვერპლი გახდა 55 ადამიანი, მათგან 53 – ჟურნალისტები, ოპერატორები და ფოტოგრაფები. შსს ძალადობის ყველა ფაქტს იძიებს, ამ დროისათვის სისხლის სამართლის საქმეებზე მიმდინარე გამოძიების ფარგლებში იდენტიფიცირებული და დაკავებულია შვიდი ადამიანი.