თბილისი, 7 ივლისი – Sputnik. თბილისის „დინამო“ უეფას ჩემპიონთა ლიგის პირველი საკვალიფიკაციო რაუნდის პირველ მატჩში ბაქოს „ნეფთჩისთან“ საკუთარ მოედანზე ანგარიშით 1:2 დამარცხდა.
სტუმრები დაწინაურდნენ პირველი ტაიმის შუა ნაწილში ნამიკ ალასგაროვის ზუსტი დარტყმის შემდეგ.
„დინამოელებმა“ ანგარიშის გათანაბრება 36-ე წუთზე შეძლეს, თავისი ძალითა და სილამაზით გამორჩეული გოლი კლუბის საუკეთესო ბომბარდირმა ზორან მარუშიჩმა გაიტანა.
შესვენების შემდეგ მოედანზე საკმაოდ თანაბარი ბრძოლა წარიმართა, სანამ ლევან ხარაბაძემ 56-ე წუთზე შეცდომა არ დაუშვა და იქვე მყოფმა ემინ მახმუდოვმა ზუსტად შეასრულა 11-მეტრიანი.
მასპინძლებს ანგარიშის გათანაბრებისთვის ნახევარ საათზე მეტი დრო ჰქონდათ, მაგრამ კახა ცხადაძის შეგირდებმა „ნეფთჩის“ კარის მისამართით ვერც ერთხელ ვერ დაარტყეს. ყველაზე რეალური მომენტი ჰქონდა ბაქარ ქარდავას, რომელმაც დამატებით დროში კუთხურიდან ჩაწოდებული ბურთი ძელს მოარტყა.
თბილისის „დინამოელები“ ვერ იმარჯვებენ უეფას ჩემპიონთა ლიგის კვალიფიკაციაში 2016 წლიდან. მაშინ „დინამომ“ ერევნის „ალაშკერტს“ მოუგო.
თბილისის „დინამოსა“ და „ნეფთჩის“ საპასუხო შეხვედრა ერთ კვირაში ბაქოში შედგება. გამარჯვებული გუნდი უეფას ჩემპიონთა ლიგაში ბრძოლას გააგრძელებს, ხოლო წაგებული - უეფას კონფერენციების ლიგაში.