ყოფილი თავდაცვის მინისტრი თინა ხიდაშელი გამოკვლევებზე გერმანიაში იმყოფება. ამის შესახებ „ფეისბუქზე” მან თავად დაწერა. ყოფილი მინისტრი წერს, რომ მიუხედავად ბევრი დიდი თუ პატარა პრობლემისა, რომელიც ყოველდღიურად ჩნდება, როგორც ჩანს, ყველაფერი კარგად იქნება და სიარულსაც შეძლებს, თუმცა წინ ჯერ კიდევ გრძელი და რთული გზაა.
თინა ხიდაშელს კორონავირუსი მიმდინარე წლის 18 თებერვალს დაუდასტურდა და მას საავადმყოფოში მკურნალობდნენ. გარკვეული პერიოდის შემდეგ კლინიკიდან გაწერეს, მაგრამ ჯანმრთელობის მდგომარეობის გაუარესების გამო ისევ საავადმყოფოში გადაიყვანეს.
როგორც პოლიტიკოსი წერდა, ავადმყოფობის გამო ბევრი რამ გამოტოვა: თოვლი თბილისში, გაზაფხულის მოსვლა, შვილის დაბადების დღე, ბზობა, აღდგომა, რადგან თავი ვერ დააღწია საავადმყოფოს, ჟანგბადის და ათასგვარ სხვა აპარატს, წამლებს, ნემსებს, გადასხმებს...