თბილისი, 5 ივლისი − Sputnik. ფეხშიშველა სიარული სასარგებლოა ჯანმრთელობისთვის, თუმცა არა ყველანაირ ზედაპირზე, აცხადებს რადიო Sputnik-თან ინტერვიუში ექიმი ვლადიმირ ხოროშევი.
მისი თქმით, უფეხსაცმლოდ სიარულისას ხდება ტერფების მასაჟი, სადაც უამრავი ბიოლოგიურად აქტიური წერტილია განლაგებული.
„ბიოლოგიურად აქტიური წერტილები ადამიანის ტერფის მთელ ზედაპირზეა თავმოყრილი. ანუ ტერფზე პირდაპირ პროეცირდება ყველა ჩვენი ორგანო და სისტემა: აქ არის ღვიძლიც, კუჭქვეშა ჯირკვალიც, თავის ტვინიც“, − ამბობს ექიმი.
როგორც სპეციალისტი ამბობს, ფეხშიშველი სიარული ყველაზე სასარგებლოა ხრეშზე, ქვიშასა და ბალახზე.
„ამასთან ხრეშზე − ყველაზე მეტად. ოღონდ სასურველია, რომ ის მომრგვალო ფორმისა იყოს, არ ჰქონდეს წაწვეტებები, რათა ფეხი არ გაიჭრათ. ხრეშზე სიარულისას იმავდროულად სახსრებიც ვარჯიშდება“, − განმარტავს ექიმი.
გარდა ამისა, ხოროშევმა დაასახელა ზედაპირები, რომლებზე ფეხშიშველი სიარულიც არ ღირს. ესენია ასფალტი და ბეტონი.
ამასთან ექიმი გვაფრთხილებს, რომ ფეხშიშველა სიარული დღეში ორ-სამ საათზე მეტი ხნის განმავლობაში სასურველი არ არის, ვინაიდან ადამიანების უმეტესობას − ქალების შემთხვევაში კი პრაქტიკულად ყველას − ბრტყელტერფიანობა აწუხებს.