თბილისი, 2 ივლისი — Sputnik. სამართალდამცველებმა წყლის დაბინძურების ბრალდებით ბოლნისში 20 წლის მამაკაცი დააკავეს, ნათქვამია საქართველოს შინაგან საქმეთა სამინისტროს მიერ გავრცელებულ განცხადებაში.
გამოძიების თანახმად, ბრალდებულმა მიმდინარე წლის 30 ივნისს ბოლნისის მუნიციპალიტეტში მდინარე ქციაში (მდ. ხრამი) დიდი რაოდენობით პოლიეთილენის ბოთლი გადაყარა. ფაქტის ამსახველი ვიდეომასალა სხვადასხვა სოციალურ ქსელში გავრცელდა.
უწყების ცნობით, სამართალდამცველებმა კანონდამრღვევი პირის იდენტიფიცირება მალევე შეძლეს.
წყლის დაბინძურების ფაქტზე გამოძიება საქართველოს სსკ-ის 292-ე მუხლით მიმდინარეობს. დანაშაული ერთ წლამდე ვადით თავისუფლების აღკვეთას ითვალისწინებს.