თბილისი, 25 ივნისი – Sputnik. საქართველოს მთავრობის მთავარი ამოცანაა მთლიანი შიდა პროდუქტი (მშპ) ერთ სულ მოსახლეზე 10 წელიწადში 10 ათას დოლარამდე გაზარდოს, განაცხადა საქართველოს პრემიერ-მინისტრმა ირაკლი ღარიბაშვილმა.
სტატისტიკის ეროვნული სამსახურის მონაცემების თანახმად, ერთ სულ მოსახლეზე მშპ 2020 წელს 4.275,5 დოლარს შეადგენდა, ხოლო 2019 წელს – 4.696,2 დოლარს.
„ჩვენი ამოცანა უნდა იყოს – მომდევნო ათი წლის განმავლობაში ერთ სულ მოსახლეზე მთლიანი შიდა პროდუქტის 10 ათას დოლარამდე გაზრდა. უმუშევრობის მაჩვენებელი უნდა გახდეს 9% ჩვენი მინიმალური გეგმის მიხედვით“, – განაცხადა ღარიბაშვილმა პარლამენტში სიტყვით გამოსვლისას.
მთავრობის მეთაურმა ასევე აღნიშნა, რომ ივლისიდან ყველა სამინისტრო წარმოადგენს განვითარების დეტალურ გეგმას და პარლამენტი, ექსპერტები და საზოგადოება მათ სრულყოფაზე მუშაობაში ჩართვას შეძლებენ.
„ჩვენი ამოცანაა – სექტემბრის ბოლოს აღნიშნული გეგმა დავასრულოთ, წარმოვადგინოთ და დავიწყოთ მისი იმპლემენტაციის მაქსიმალური კონტროლი და მონიტორინგი“, – განაცხადა პრემიერმა.
საქართველოს პრემიერ-მინისტრმა პარლამენტში მთავრობის მიერ ერთი წლის განმავლობაში გაწეული მუშაობის ანგარიში და სამომავლო გეგმები წარადგინა.