თბილისი, 15 ივნისი – Sputnik. სამართალდამცველებმა თბილისში ყაჩაღობის ბრალდებით სამი პირი დააკავეს, ნათქვამია შინაგან საქმეთა სამინისტროს მიერ გავრცელებულ განცხადებაში.
გამოძიება სსკ-ის ორი მუხლით მიმდინარეობს – „დიდი ოდენობით ნივთის დაუფლების მიზნით ბინაში უკანონო შეღწევით ჯგუფურად ჩადენილი ყაჩაღობა“ და „საბრძოლო მასალის მართლსაწინააღმდეგო შეძენა-შენახვა“.
შსს-ს ცნობით, ორ პირს ყაჩაღობა ედება ბრალად, მესამეს კი ყაჩაღურად მოპოვებული ძვირფასეულობის გასაღება.
გამოძიებით დადგინდა, რომ მიმდინარე წლის 10 ივნისს ორი პირი ყაჩაღურად თავს დაესხა თბილისში, სიმონ ჩიქოვანის ქუჩაზე მდებარე ერთ-ერთი საცხოვრებელი სახლის მეპატრონეს და დანის მუქარით 40 ათასი ლარის ღირებულების ოქროს ნივთები გამოსძალა.
მესამე დაკავებულმა პირმა კი ყაჩაღური თავდასხმის შედეგად მოპოვებული ოქროს ნივთები ქუთაისში არსებულ „ოქროს ბირჟის“ ერთ-ერთ თანამშრომელზე გაასაღა.
სამართალდამცველებმა ყაჩაღობის შედეგად გატაცებული ნივთები ნივთმტკიცების სახით ამოიღეს. ერთ-ერთი ბრალდებულის საცხოვრებელი სახლის ჩხრეკისას ასევე ამოღებულია ცეცხლსასროლი იარაღისთვის განკუთვნილი ვაზნები.