თბილისი, 13 მაისი – Sputnik. რუსთაველის ეროვნულ თეატრში ქართული თეატრისა და კინოს ცნობილი მსახიობების – მედეა ჩახავას, სალომე ყანჩელისა და მარინე თბილელის დაბადებიდან 100 წლისთავისადმი მიძღვნილი საღამო გაიმართა.
საღამოზე წარმოდგენილი იყო საარქივო მასალა, რომელიც სამი ქართველი მსახიობის შემოქმედებასა და მოღვაწეობას ასახავდა. ღონისძიებაზე გამოჩენილი არტისტები კოლეგებმა და მეგობრებმა გაიხსენეს.
„შევეცადეთ გაგვეხსენებინა ეს სამი არაჩვეულებრივი არტისტი. დარწმუნებული ვარ, რომ მათი სულები ახლა რუსთაველის თეატრში ტრიალებს და ბედნიერები არიან დღევანდელი დღით. ჩვენც ბედნიერები ვართ, რომ ამის შესაძლებლობა გვაქვს“, – განაცხადა თეატრმცოდნე ნიკა წულუკიძემ.
საიუბილეო საღამო თბილისის მერიის მხარდაჭერით ჩატარდა.
საქართველოს სახალხო არტისტები მედეა ჩახავა, სალომე ყანჩელი და მარინე თბილელი რუსთაველის თეატრში მოღვაწეობდნენ. მედეა ჩახავა გადაღებულია ისეთ ცნობილ მხატვრულ ფილმებში როგორიცაა, „ჭრიჭინა“, „ბაში-აჩუკი“, „მხიარული რომანი“ და სხვ. არანაკლებ ცნობილ ქართულ ფილმში მონაწილეობდნენ სალომე ყანჩელი და მარინე თბილელიც.