მარი მახარობლიძე საკმაოდ დიდი ხანია ამ სფეროში მოღვაწეობს. აქვს კერამიკის სახელოსნო, სადაც ულამაზესი ნამუშევრები იქმნება. მარი თიხას სათანადოდ ამუშავებს, მისგან სხვადასხვა ფორმებს ძერწავს, წვავს და დეკორით ამკობს. ამის შესახებს დაწვრილებით მარი თავად გიამბობთ.
- პროფესიით მხატვარი ვარ. ძირითადად კერამიკით ვარ დაკავებული. მაქვს კერამიკის სახელოსნო, სადაც ვმუშაობ და ვასწავლი კიდეც. ვცხოვრობ თბილისში. მიყვარს და მიტაცებს ყველაფერი, რაც ხელით იქმნება.
- რამდენად მნიშვნელოვანი დღესასწაულია თქვენთვის აღდგომა?
- აღდგომა, როგორც ყველა ქრისტიანისთვის, ჩემთვისაც განსაკუთრებული დღესასწაულია. აღდგომა ასოცირდება გაზაფხულთან და ყველაფრის ახლიდან დაბადებასთან. როგორც ყველა, მეც დიდი სიხარულით და სამზადით ველოდები ამ დღის დადგომას.
- ეს განწყობა თქვენს ნამუშევრებშიც იგრძნობა. ულამაზესი და საოცარი სააღდგომო დეკორაციები გაქვთ შექმნილი. როგორ აკეთებთ ამ ყველაფერს?
- თიხა გვაძლევს იმის საშუალებას, რომ ჩვენი სურვილები და ჩანაფიქრი სისრულეში მოვიყვანოთ, თიხაზე მუშაობა ხომ ღმერთის ხელობაა. ცოტა რთული და ხანგრძლივი პროცესია, მაგრამ მოულოდნელობებით არის აღსავსე. საინტერესოც სწორედ ამიტომაა. არასდროს არ იცი საბოლოოდ რა გამოვა. როდესაც გამოვძერწავ, მის გაშრობას 3–4 დღე სჭირდება, შემდეგ პირველი გამოწვა, მოხატვა, მოჭიქურება და ისევ ღუმელი. ამ 10-დღიანი ეტაპის შემდეგ ელოდები სასწაულს.
- რა შეიძლება გახდეს თქვენი შთაგონების წყარო?
- შთაგონების წყარო შეიძლება ნებისმიერი რამ გახდეს: ამინდი, ხასიათი, განვლილი დღე, მეგობარი, ემოცია და ა.შ.
- როგორ ხატავთ კვერცხზე? რთული არ არის მცირე ზომის ნივთებზე ხატვა?
- სიმართლე გითხრათ, თიხაზე ხატვა იმაზე რთული პროცესია, ვიდრე ტილოზე ან სხვა ტექნოლოგიაში. ხშირად დამთენებია ერთი ნივთის მოხატვაში, მაგრამ ეს პროცესი ძალიან სასიამოვნოცაა. ბევრი ძალისხმევა, სიზუსტე სჭირდება, მაგრამ შედეგი იმდენად საინტერესო და სასიამოვნოა, რომ შემდეგ ვფიქრობ - ეს ამად ღირდა.
- სხვა სახის დეკორაციებს თუ ქმნით, ან სხვა ხელსაქმე თუ გეხერხებათ?
- კი, გამოყენებითი ხელოვნება მაქვს დამთავრებული. ვიცი გობელენები, ბატიკა, თექა, ტიხრული მინანქარი, ტანსაცმლის დიზაინი და კიდევ მრავალი სხვა.
- სამომავლო გეგმებიც გაგვანდეთ...
- სამომავლოდ ვაპირებ გამოფენის გაკეთებას და პატარა შოურუმის გახსნას. იმედია ყველაფერი მალე გამოსწორდება და დავუბრუნდებით ჩვეულ ცხოვრებას.