თბილისის მერმა კახა კალაძემ ბოხუას სახელობის კლინიკა 4 აპრილს დატოვა. როგორც მან ჟურნალისტებთან განაცხადა, თავს კარგად გრძნობს, თუმცა გარკვეული დროის განმავლობაში მკურნალობას სახლში გააგრძელებს.
მოგვიანებით კახა კალაძემ „ინსტაგრამზე“ ვიდეო გამოაქვეყნა, სადაც ჩანს, რომ მისი სახლში დაბრუნება ბავშვებს და ძაღლებს ძალიან გაუხარდათ. რაც შეეხება მის მეუღლეს, ცნობილი დიზაინერი ანუკი არეშიძე თბილისის მერს კლინიკის დატოვებისას თან ახლდა.
კახა კალაძემ 26 მარტს განაცხადა, რომ ბოლო პერიოდში საჯაროდ არ ჩანდა ჯანმრთელობის მდგომარეობის გამო.
პირველადი დიაგნოზით თბილისის მერს ვერტებრო-ბაზილარული სინდრომი ჰქონდა, თუმცა დიაგნოზი არ დაუდასტურდა. დამატებითი კვლევების შემდეგ გაირკვა, რომ მას აქვს არტერიული წნევის არასტაბილურობა.