თბილისი, 2 აპრილი – Sputnik. ლანჩხუთისა და ოზურგეთის მუნიციპალიტეტების სოფლების საჯარო სკოლებსა და საბავშვო ბაღებში გამოვლენილი კორონავირუსის შემთხვევების გამო სასწავლო პროცესი დისტანციურად გაგრძელდება, იუწყება „პირველი არხი“.
გავრცელებული ინფორმაციით, სასწავლო დაწესებულებები ონლაინ–რეჟიმში ორი კვირის განმავლობაში გააგრძელებენ ფუნქციონირებას.
„ნიგოითის, ჩოჩხათისა და ნიგვზიანის ადმინისტრაციულ ერთეულებში მოქმედ და სოფელ წყალწმინდის საჯარო სკოლასა და საბავშვო ბაღში სწავლის პროცესი დისტანციურ რეჟიმზე გადავა“, – ნათქვამია ლანჩხუთის მერიის მიერ გავრცელებულ განცხადებაში.
კოვიდ-ინფიცირების შემთხვევების გამო დისტანციურ რეჟიმში გადადის ოზურგეთის მუნიციპალიტეტის სოფელ შროშაში მდებარე სკოლა და საბავშვო ბაღიც.
ლანჩხუთისა და ოზურგეთის მუნიციპალიტეტების აღნიშნულ სოფლებში მოსახლეობის მასობრივი ტესტირება დაიწყება.