თბილისი, 29 მარტი – Sputnik. საქართველოს განათლებისა და მეცნიერების სამინისტრო ქვეყნის მასშტაბით სასწავლო პროცესის უსაფრთხო გარემოში მიმდინარეობის მონიტორინგს აქტიურად ახორციელებს, ნათქვამია უწყების მიერ გავრცელებულ განცხადებაში.
15 თებერვლიდან საქართველოს მასშტაბით სასწავლო პროცესი საკლასო ოთახებში განახლდა. ამასთან, მშობლებს დისტანციური სწავლების არჩევანის უფლებაც აქვთ. სასწავლო პროცესი საკლასო ოთახებში განახლებული წესების დაცვით აღდგა – აუცილებელია პირბადის ტარება (V-XII კლასების მოსწავლეებისთვის), ერთმეტრიანი დისტანციის დაცვა, თერმოსკრინინგი.
ამჯერად მინისტრის პირველი მოადგილე ეკატერინე დგებუაძე ბათუმისა და ქობულეთის საჯარო სკოლებს ეწვია და დაწესებულებებში ვირუსის გავრცელების პრევენციის მიზნით გატარებული ღონისძიებები პირადად შეაფასა.
დგებუაძის თქმით, აჭარაში სასწავლო პროცესი სანიტარიულ-ჰიგიენური ნორმების სრული დაცვით მიმდინარეობს, ასევე საკმაოდ მაღალია საკლასო ოთახებში მოსწავლეთა დასწრების მაჩვენებელი.
„რეგიონში ვირუსის შეკავების დადებითი დინამიკის შენარჩუნებისა და სასწავლო პროცესის საკლასო ოთახებში გაგრძელების კუთხით მნიშვნელოვანია სასწავლო დაწესებულებებში თითოეულმა წევრმა ზედმიწევნით დაიცვას დადგენილი რეკომენდაციები“, – განაცხადა დგებუაძემ.
ბოლო კვირის მონაცემებით, მთელი ქვეყნის მასშტაბით, მათ შორის აჭარაშიც, სკოლებში ვირუსით ინფიცირების მაჩვენებელი კვლავ დაბალ ნიშნულზე რჩება. ამ ეტაპზე აჭარის რეგიონში სრულ დისტანციურ სწავლებაზე არც ერთი სკოლა არ იმყოფება. რაც შეეხება ცალკეულ კლასებს, მხოლოდ ხუთი კლასი აგრძელებს სწავლას ონლაინ–ფორმატში.