თბილისი, 26 მარტი — Sputnik. ბავშვებში ონკოლოგიური დაავადებები იშვიათად გვხვდება, თუმცა არსებობს სიმსივნეების ათამდე ქვეტიპი, რომლებიც ადრეულ ასაკში იჩენს თავს, აცხადებს მედიცინის მეცნიერებათა კანდიდატი, ონკოლოგი და ქირურგი მიხაილ მიასნიანკინი.
სპეციალისტის თქმით, კიბოს პროვოცირებას უპირველესად გენეტიკური ფაქტორები, განვითარების ანომალიები და ორგანიზმზე არახელსაყრელი გარემო პირობების გავლენა ახდენს.
ექიმი ხაზს უსვამს, რომ ბავშვებში ონკოლოგიური დაავადებები პირდაპირ კავშირშია მშობლების, განსაკუთრებით კი დედის ჯანმრთელობასთან.
„შესაძლო ფაქტორებს განეკუთვნება ორსულობის დროს მოწევა, ალკოჰოლური სასმელების მიღება, შარდ-სასქესო სისტემის ქრონიკული ანთებები და ასევე სამშობიარო ტრავმები“, — განმარტავს ონკოლოგი.
მისი თქმით, კიბოს ერთ-ერთი ყველაზე გავრცელებული ფორმა ბავშვებში ლეიკოზია — უკიდურესად საშიში დაავადება, რომელიც სერიოზულ ქიმიოთერაპიულ ან სხივურ მკურნალობას მოითხოვს.
ექიმის თქმით, არსებობს რიგი საგანგაშო სიგნალები, რომლებიც მშობლებს ბავშვში სისხლისა და ძვლის ტვინის კიბოს განვითარებაზე მიანიშნებს.
ეს პირველადი სიმპტომებია:
- იოლად დაღლილობა;
- მადის დაქვეითება;
- წონის დაკარგვა;
- მტირალობა;
- კანის გაფერმკრთალება;
- გარშემო მიმდინარე პროცესებისადმი უყურადღებობა.
ონკოლოგი მოუწოდებს მშობლებს, ყურადღებით დააკვირდნენ შვილებს და ჩამოთვლილთაგან ნებისმიერი სიმპტომის შემჩნევის შემთხვევაში დაუყოვნებლივ მიმართონ პედიატრს.