თბილისი, 26 მარტი – Sputnik. ბათუმში წმინდა ნიკოლოზის სახელობის ტაძარი დროებით დაიკეტა. ამის შესახებ ინფორმაციას ბათუმისა და ლაზეთის ეპარქია ავრცელებს.
გავრცელებული ინფორმაციით, ტაძარი კორონავირისის გამო დაიკეტა – COVID-19 დაუდგინდათ სასულიერო პირებს, მათ შორის ტაძრის წინამძღვარს და მედავითნეს.
ამ ეტაპზე ყველა ინფიცირებული იზოლაციაში იმყოფება, ტაძარში კი სადეზინფექციო სამუშაოები ტარდება.
„ჩვენს ტაძარში გართულებული ეპიდსიტუაციიდან გამომდინარე, მეუფე დიმიტრის ლოცვა-კურთხევით, შაბათს, საღამოს ლოცვამდე წმინდა ნიკოლოზის ტაძარი იქნება დაკეტილი. ტარდება დეზინფექცია", – ნათქვამია განცხადებაში.
ბოლო 24 საათის განმავლობაში აჭარაში კორონავირუსი 26 ადამიანს დაუდასტურდა.
საქართველოში ახალი კორონავირუსით დაავადებულთა რაოდენობა ბოლო დღე-ღამეში 419-ით გაიზარდა და ინფიცირებულთა საერთო რიცხვმა 279.446-ს მიაღწია.