თბილისი, 23 მარტი – Sputnik. საქართველოს ექვს ქალაქში 175 ახალი, თანამედროვე სტანდარტების შესატყვისი ავტობუსი იმოძრავებს, იუწყება საქართველოს მუნიციპალური განვითარების ფონდი.
საქალაქო ტრანსპორტის განვითარების პროგრამის ფარგლებში საქართველოს ინფრასტრუქტურისა და რეგიონული განვითარების სამინისტრომ მუნიციპალური განვითარების ფონდთან ერთად ექვსი ქალაქისთვის 175 ერთეული ავტობუსი შეიძინა. ფოთსა და თელავში იმოძრავებს 10–10 ავტობუსი, გორში – 30, ზუგდიდში – 25, რუსთავში 40, ხოლო ქუთაისში – 60.
ამ ქალაქებში იმოძრავებს 8,5 მეტრი სიგრძის 117 ავტობუსი და 10 მეტრი სიგრძის 58 ავტობუსი. ყველა სრულად არის ადაპტირებული შეზღუდული შესაძლებლობების პირებისთვის.
პროგრამა დაფინანსებულია ევროპის რეკონსტრუქციისა და განვითარების ბანკის მიერ. კონტრაქტის საერთო ღირებულებაა 18,7 მლნ ევრო.