თბილისი, 18 მარტი – Sputnik. უცხოეთის იმ მოქალაქეებს, რომელთაც აქვთ Johnson&Johnson-ის ვაქცინით ერთჯერადი აცრა ჩატარებული, საქართველოში შეუფერხებლად შემოსვლის უფლება ეძლევათ.
საქართველოს მთავრობამ შესაბამისი ცვლილებები იზოლაციისა და კარანტინის წესში 17 მარტს შეიტანა. შესაბამისი დადგენილება „საკანონმდებლო მაცნეს“ ვებ-გვერდზე უკვე გამოქვეყნდა.
როგორც ცნობილია, Johnson&Johnson-ის პრეპარატით სრული ვაქცინაციისთვის, სხვა ვაქცინებისგან განსხვავებით, მხოლოდ ერთი აცრის ჩატარებაა აუცილებელი.
სხვა ვაქცინების შემთხვევაში ქვეყანაში შემომსვლელმა ნებისმიერმა პირმა უნდა წარმოადგინოს ვაქცინაციის სრული კურსის (2 აცრა) ჩატარების დამადასტურებელი დოკუმენტი.
„უცხო ქვეყნიდან ჩამოსული ნებისმიერი პირი (მოქალაქეობის მიუხედავად) ნებისმიერი ტიპის კოვიდვაქცინის სრული კურსის (ორი დოზა, ხოლო johnson&Johnson-ის შემთხვევაში – ერთი დოზა) დამადასტურებელი დოკუმენტის საზღვარზე წარდგენის შემთხვევაში არ ექვემდებარება ამ დადგენილებით განსაზღვრულ შეზღუდვებს“, – ნათქვამია დოკუმენტში.
თუ პირს ვაქცინაცია გავლილი არ აქვს, მაშინ მას რიგი მოთხოვნების შესრულება მოუწევს.
ევროკავშირისა და ზოგიერთი სხვა სახელმწიფოს მოქალაქეები საქართველოს ტერიტორიაზე საჰაერო გზით შემოსვლას შეძლებენ უარყოფითი PCR-ტესტის წარმოდგენის შემთხვევაში, რომელიც ჩამოსვლამდე არაუგვიანეს 72 საათის განმავლობაშია გაკეთებული. ჩამოსვლიდან მესამე დღეს ისინი ვალდებული არიან საკუთარი ხარჯით განმეორებითი ტესტი გაიკეთონ.
ჯანმო მოუწოდებს, დააკვირდნენ Johnson & Johnson-ის ვაქცინის გვერდით ეფექტებს>>>
ამერიკული კონცერნი Johnson&Johnson-ის მიერ წარმოებული კორონავირუსის საწინააღმდეგო ვაქცინა ევროკომისიისა და ევროკავშირის პროფილური უწყების მიერ უკვე ნებადართულია.
ჯანდაცვის მსოფლიო ორგანიზაცია ასევე რეკომენდაციას გასცემს კომპანია Johnson&Johnson-ის ვაქცინის გამოყენებაზე და მიანიშნებს მის ეფექტურობასა და უსაფრთხოებაზე.
2021 წლის 1 თებერვლიდან საქართველომ რეგულარულ საერთაშორისო ავიამიმოსვლაზე ყველა შეზღუდვა გააუქმა. ქვეყანაში შემოსვლა მხოლოდ საჰაერო გზითაა ნებადართული. საქართველოს სახმელეთო საზღვარი ვიზიტორებისთვის კვლავ ჩაკეტილია.