თბილისი, 18 მარტი - Sputnik. საქართველოს პროკურატურამ თბილისის საქალაქო სასამართლოს „ძალადობით ჩადენილი სექსუალური ხასიათის ქმედების“ ბრალდებით დაკავებული ოპოზიციონერი პოლიტიკოსის გოგი წულაიას მიმართ აღკვეთის ღონისძიების სახით პატიმრობის შეფარდების შუამდგომლობით მიმართა.
პოლიციამ 58 წლის წულაია, რომელიც ქუთაისში ერთ-ერთი ყველაზე აქტიური და ხმაურიანი ოპოზიციონერი პოლიტიკოსია, დაზარალებულის ჩვენებების საფუძველზე ოთხშაბათს დააკავა. გამოძიების ვერსიით, წულაიამ თბილისში, დროებით საცხოვრებელ ბინაში თავის ნაცნობ 42 წლის ქალზე იძალადა.
წულაიას ბრალდება წარედგინა სსკ-ის 138-ე მუხლის პირველი ნაწილით, რაც „ძალადობით ჩადენილი სექსუალური ხასიათის სხვაგვარი ქმედებას“ გულისხმობს.
ბრალის დამტკიცების შემთხვევაში მას 4-დან 6 წლამდე თავისუფლების აღკვეთა ემუქრება.