თბილისი, 17 მარტი – Sputnik. ოპოზიციური პარტია „საქართველოს ლეიბორისტული პარტიის“ ლიდერმა შალვა ნათელაშვილმა კრისტიან დანიელსონის მედიაციით მიმდინარე „ქართული ოცნებისა“ და ოპოზიციის ლიდერების შეხვედრა პროტესტის ნიშნად დატოვა.
მმართველი პარტია „ქართული ოცნება – დემოკრატიული საქართველო“ და ოპოზიციის ლიდერები ამ წუთებში მოლაპარაკებებს მართავენ, რათა ქვეყანაში პოლიტიკური კრიზისიდან გამოსვლის გზები გამონახონ. შეხვედრა თბილისში, ევროკავშირის წარმომადგენლობის ოფისში იმართება. შეხვედრის მედიატორი ევროპული საბჭოს პრეზიდენტის შარლ მიშელის პირადი წარმომადგენელი კრისტიან დანიელსონია.
როგორც ნათელაშვილმა განაცხადა, „ლეიბორისტული პარტია“ ტოვებს მოლაპარაკებათა იმ ფორმატს, სადაც პირველ საკითხად არ იხილება ახალი საპარლამენტო არჩევნების თარიღი და პოლიტპატიმრების გათავისუფლების საკითხი.
„მე დავუბრუნდები მოლაპარაკების მაგიდას, კონსულტაციებს და რაუნდებს, როგორც კი ეს ორი საკითხი იქნება გარკვეული", – აღნიშნა ნათელაშვილმა.
„ლეიბორისტული პარტიის“ ლიდერის განცხადებით, აღნიშნულ შეხვედრაზე პირველ განსახილველ საკითხად საარჩევნო და სასამართლო სისტემების რეფორმის პრობლემატიკაა შემოთავაზებული.
შეხვედრაზე მმართველ პარტიას „ქართული ოცნების“ თავმჯდომარე ირაკლი კობახიძე და პარლამენტის თავმჯდომარე არჩილ თალაკვაძე წარმოადგენენ. ოპოზიციის მხრიდან კი შეხვედრას ესწრებიან: აკაკი მინაშვილი („ერთიანი ნაციონალური მოძრაობა“), გიგა ბოკერია („ევროპული საქართველო – მოძრაობა თავისუფლებისთვის“), ზურაბ ჯაფარიძე („გირჩი – მეტი თავისუფლება“), ალეკო ელისაშვილი („მოქალაქეები“) და ოპოზიციის სხვა ლიდერები.
დანიელსონი საქართველოს 12 მარტს ეწვია და მთელი ეს პერიოდი ხელისუფლებისა და ოპოზიციის წარმომადგენლებთან შეხვედრებს მართავს – შექმნილი პოლიტიკური კრიზისიდან გამოსვლის გეგმას განიხილავს. გეგმა ხუთი ძირითადი პუნქტისგან შედგება: ამბიციური საარჩევნო რეფორმა, სასამართლო რეფორმა, პოლიტპატიმრების გათავისუფლება და პოლიტიკური მართლმსაჯულების შეჩერება, ძალების გადანაწილება პარლამენტში და პოტენციური ვადამდელი არჩევნები/მზადება ადგილობრივი არჩევნებისთვის.
როგორც ევროკომისიის ვიცე-პრეზიდენტმა ჯოზეფ ბორელმა გუშინ ბრიუსელში გამართულ პრესკონფერენციაზე განაცხადა, დანიელსონი უახლოეს დროში მხარეებს პოლიტიკური კრიზისის დაძლევისთვის კონკრეტული წინადადებებით მიმართავს.
დასავლელი შუამავლები უკვე რამდენიმე თვის განმავლობაში ცდილობენ გავლენა მოახდინონ საქართველოში არსებულ სიტუაციაზე, მაგრამ ჯერჯერობით უშედეგოდ – პოლიტიკური კრიზისი სულ უფრო ღრმავდება. საპარლამენტო არჩევნებიდან ოთხი თვის შემდეგ ოპოზიციის ძირითადი ნაწილი კვლავ არ აღიარებს მათ შედეგებს და ვადამდელ არჩევნებს მოითხოვს. ხელისუფლება განიხილავს ამ საკითხს „წითელ ხაზად“, არჩევნების გაყალბების ბრალდებებს უსაფუძვლოს უწოდებს და ოპოზიციას მოლაპარაკებებზე ყურადღების სხვა საკითხებზე გამახვილებას სთავაზობს.