თბილისი, 1 მარტი – Sputnik. მამაკაცს, რომელიც 11 წლის შვილს მათხოვრობას აიძულებდა, არასრულწლოვნის შრომითი ტრეფიკინგის ფაქტზე ბრალდება წარედგინა, იუწყება საქართველოს გენერალური პროკურატურა.
გენერალური პროკურატურის ცნობით, ჩატარებული გამოძიებით დადგინდა, რომ 2015 წლიდან 2021 წლის იანვრის ჩათვლით მამაკაცი ფიზიკური ძალადობით და ფსიქოლოგიური ზეწოლით აიძულებდა ბავშვს თბილისის ქუჩებში მოწყალების თხოვნას და სხვადასხვა ნივთების გაყიდვას. ამასთან, სავალდებულოდ დაუწესა მისთვის ყოველ დღე 50 ლარის მიტანა, შეუსრულებლობის შემთხვევაში კი მასზე ძალადობდა ფიზიკურად და ფსიქოლოგიურად. მცირეწლოვანის მიერ მათხოვრობით ნაშოვნ ფულს კი თვითონ ისაკუთრებდა.
„შრომითი ექსპლუატაციის განხორციელების შედეგად, ზიანდებოდა არასრულწლოვნის ჯანმრთელობა, ფიზიკური და სულიერი განვითარება. ბრალდების შესახებ დადგენილების გაცნობის შემდეგ, მამაკაცმა აღიარა ჩადენილი დანაშაული და თავი დამნაშავედ ცნო წარდგენილ ბრალდებაში“, - ნათქვამია პროკურატურის გვერდზე გავრცელებულ ინფორმაციაში.
მამაკაცს ბრალდება წარედგინა საქართველოს სისხლის სამართლის კოდექსის 432-ე მუხლის მე-2 ნაწილის „ბ“ ქვეპუნქტით და მე-3 ნაწილის „ბ“ და „ე“ ქვეპუნქტებით - „არასრულწლოვნით ვაჭრობა (ტრეფიკინგი)“, „არასრულწლოვნის გადაბირება ექსპლუატაციის მიზნით, დამნაშავისათვის წინასწარი შეცნობით მასზე მატერიალურად და სხვაგვარად დამოკიდებულის მიმართ, ჩადენილი იძულებით, ჯანმრთელობისათვის საშიში ძალადობით და ასეთი ძალადობის გამოყენების მუქარით“, რაც სასჯელის სახით 14-დან 17 წლამდე თავისუფლების აღკვეთას ითვალისწინებს.
უწყების ცნობით, ბრალდებულს სხვა სისხლის სამართლის საქმეზე წარმოებული გამოძიების ფარგლებში შეფარდებული აქვს პატიმრობა. შესაბამისად, პროკურატურა თბილისის საქალაქო სასამართლოს კანონით დადგენილ ვადაში მიმართავს შუამდგომლობით წინასასამართლო სხდომის თარიღის განსაზღვრის შესახებ.