თბილისი, 25 თებერვალი – Sputnik. სამართალდამცველებმა ტელეკომპანია „ფორმულის” ტელეწამყვან ვახო სანაიასა და მისი მეუღლის ნათესავზე თავდასხმის ფაქტზე სამი პირი დააკავეს, ნათქვამია შსს-ს მიერ გავრცელებულ განცხადებაში.
თავდასხმა წუხელ მოხდა წყნეთის ქუჩაზე.
როგორც გამოძიებით დადგინდა, ნასვამ მდგომარეობაში მყოფმა სამმა პირმა ურთიერთშელაპარაკების ნიადაგზე ფიზიკურად იძალადა ამ ადამიანებზე.
გამოძიება საქართველოს სისხლის სამართლის კოდექსის 126-ე მუხლის პირველი პრიმა ნაწილის „ბ“ და „გ“ ქვეპუნქტებით მიმდინარეობს, რაც ორი ან მეტი პირის მიმართ ჯგუფურად ჩადენილ ძალადობას გულისხმობს და ორ წლამდე ვადით თავისუფლების აღკვეთას ითვალისწინებს.