თბილისი, 23 თებერვალი – Sputnik. ქართველმა ძიუდოისტმა ეთერ ლიპარტელიანმა ძიუდოს საერთაშორისო ფედერაციის მიერ განახლებულ რეიტინგში 21-ე ადგილზე გადაინაცვლა და ტოკიოს ოლიმპიურ თამაშებში მონაწილეობის ლიცენზია მოიპოვა.
ეთერ ლიპარტელიანმა ისრაელის ქალაქ თელ-ავივში გამართულ გრანდ სლემის ტურნირზე ბრინჯაოს მედალი მოიპოვა, რის შედეგადაც საერთო რეიტინგში 500 ქულა დაემატა და შვიდი საფეხურით დაწინაურდა.
ეთერ ლიპარტელიანი პირველი ქართველი ქალი ძიუდოისტია, რომელმაც გრანდ სლემის ტურნირზე მედლის მოპოვება მოახერხა. პარალელურად ის პირველი ქართველი ქალია, ვინც ოლიმპიურ თამაშებზე იასპარეზებს.
ტოკიოში ოლიმპიადა 2020 წლის 24 ივლისიდან 9 აგვისტომდე უნდა ჩატარებულიყო, მაგრამ პანდემიის გამო ჩემპიონატი ერთი წლით გადაიდო და 2021 წლის 23 ივლისიდან 8 აგვისტომდე პერიოდში გაიმართება.