თბილისი, 10 თებერვალი – Sputnik. ერთი ადამიანი დაშავდა ხანძრის შედეგად, რომელიც სავაჭრო ცენტრ „მეგალაინთან“ მდებარე ერთ-ერთ სასაწყობე შენობაში გაჩნდა.
საგანგებო სიტუაციების მართვის სამსახურის თბილისის მთავარი სამმართველოს უფროსის ოთარ კერესელიძის განცხადებით, ადგილზე ოპერატიულად გამოცხადდა შვიდი სახანძრო-სამაშველო ბრიგადა.
„მსუბუქად დაშავდა ერთი მოქალაქე, რომელმაც ხელზე მიიღო მცირედი დამწვრობა. გარე ტერიტორიაზე იმყოფებოდა, მანქანა გარეთ ეყენა და გადაყენების დროს მიიღო დაზიანება“, – აღნიშნა ოთარ კერესელიძემ.
ხანძარი გაჩნდა სასაწყობე ნაგებობაში, სადაც შერეული საქონელი ინახებოდა. საქონლის ნაწილი დაიწვა.
„არსებობდა ხანძრის გავრცელების საფრთხე, თუმცა დროული რეაგირებით მოხდა ხანძრის ლოკალიზება“, – განაცხადა ოთარ კერესელიძემ.
ხანძრის გამომწვევი მიზეზი ჯერჯერობით უცნობია.