თბილისი, 9 თებერვალი – Sputnik. ფინანსთა სამინისტროს საგამოძიებო სამსახურმა ყალბი დოკუმენტების დამზადება–გასაღების ფაქტზე ერთი პირი დააკავა, ნათქვამია უწყების მიერ გავრცელებულ განცხადებაში.
გამოძიებამ დაადგინა, რომ ბრალდებულმა ბანკიდან კრედიტის მიღების მსურველ პირს 750 ლარის სანაცვლოდ ყალბი საბანკო ამონაწერი დაუმზადა – თითქოს მას ხელფასის სახით ყოველთვიურად ერიცხებოდა 2740 ლარი.
საგამოძიებო სამსახურის თანამშრომლებმა დანაშაულებრივი გზით მოპოვებული ფულადი თანხა, 20 სხვადასხვა პირზე გაცემული ყალბი საბანკო ამონაწერები და ყალბი დოკუმენტების დასამზადებლად განკუთვნილი ერთ-ერთი კომერციული ბანკისა და მიკროსაფინანსო ორგანიზაციის შტამპები ამოიღეს.
გამოძიება სსკ-ის 210-ე, 362-ე და 208-ე მუხლებით მიმდინარეობს, რაც სასჯელის სახით ითვალისწინებს თავისუფლების აღკვეთას ორიდან ხუთ წლამდე ვადით.