თბილისი, 9 თებერვალი — Sputnik. იმ ცხოველის დადგენა, რომელიც შეიძლებოდა კორონავირუსის წყარო და COVID-19-ის შუალედური გადამტანი ყოფილიყო, ჯერჯერობით ვერ მოხერხდა, განაცხადა ჩინეთის ჯანდაცვის სახელმწიფო კომიტეტის საექსპერტო კომისიის ხელმძღვანელმა ლიან ვანნიანმა პრესკონფერენციაზე.
აღნიშნულის თაობაზე წერს საინფორმაციო სააგენტო РИА Новости.
„კვლევები აჩვენებს, რომ SARS-CoV-2-თან ყველაზე ახლოს მდგომი კორონავირუსები ღამურებსა და პანგოლინებში ვლინდება. ეს ცხოველები შეიძლება იყვნენ COVID-19-ის წყარო, მაგრამ ამ ორი სახის ცხოველებში აღმოჩენილ ვირუსებსა და COVID-19-ს შორის მსგავსება არასაკმარისია იმისთვის, რომ ისინი ვირუსის თავდაპირველ მტარებლებად მივიჩნიოთ“, — აღნიშნა ვანნიანმა.
ჩინეთის ხელისუფლებამ კორონავირუსის ეპიდემიასთან დაკავშირებით ჯერ კიდევ 2020 წლის 24 თებერვალს აკრძალა ველური ცხოველებით არალეგალური ვაჭრობა და მიიღო გადაწყვეტილება, აღმოფხვრას მოსახლეობაში მათი ხორცის ჭამის ჩვევა. გადაწყვეტილებას საფუძვლად მეცნიერთა მოსაზრება დაედო, რომელთაც ახალი ტიპის კორონავირუსის თავდაპირველ პატრონებად ღამურები, ხოლო შემდგომ მტარებლებად პანგოლინები მიაჩნდათ, რომლებისგანაც გადავიდა კიდეც ვირუსი ადამიანზე.