მატჩის დასაწყისი საკმაოდ რთული აღმოჩნდა – პირველმა ნახევარმა თანაბარ ბრძოლაში ჩაიარა. პირველი ტაიმი ნულოვანი (0:0) ანგარიშით ბორჯღალოსნებსა და რუსეთის ნაკრებს შორის პირველად დასრულდა.
მეორე ტაიმში ვასილ ლობჟანიძის მიერ დადებული ლელოს შემდეგ თედო აბჟანდაძემ გარდასახვა წარმატებით შეასრულა და ანგარიში 7:0 გახდა. რამდენიმე წუთში მასპინძლებმა ჯარიმაც გამოიმუშავეს, რომლის წყალობითაც აბჟანდაძემ ანგარიში 10:0-მდე გაზარდა.
შეხვედრის 61-ე წუთზე ბოგდან ფედოტკომ ლელო დადო, ხოლო რამილ გაისინმა რეალიზება ზუსტად შეასრულა. ანგარიში გახდა 10:7 და თამაშში დაძაბულობამ იმატა, თუმცა ბორჯღალოსნებმა ძალები მალევე მოიკრიბეს და აბჟანდაძის ორი ზუსტად შესრულებული ჯარიმის წყალობით ანგარიში 16:7 გახდა.
სატურნირო თვალსაზრისით ამ მატჩს მნიშვნელობა არ ჰქონდა, რადგან ბორჯღალოსნები ჯერ კიდევ გასულ წელს გახდნენ ევროპის ერთა თასის მფლობელები, ხოლო რუსეთმა ტურნირში ადგილი შეინარჩუნა.