თბილისი, 24 დეკემბერი – Sputnik. სავაჭრო ცენტრ „სითი მოლის“ ადმინისტრაცია მომხმარებლებს მოუწოდებს, გადაუდებელი აუცილებლობის გარეშე მოლებს არ ესტუმრონ, განაცხადა „სითი მოლის“ საზოგადოებასთან ურთიერთობის სამსახურის ხელმძღვანელმა სოფო ელოშვილმა ჟურნალისტებთან საუბრისას.
სავაჭრო ობიექტებს 24 დეკემბრიდან 2 იანვრის ჩათვლით საკოორდინაციო საბჭომ მუშაობის განახლების უფლება მისცა. სავაჭრო ობიექტების გახსნის გამო დილიდან თბილისის ქუჩებში „საცობებია“, სავაჭრო ცენტრებში კი ხალხმრავლობაა. მკაცრად კონტროლდება კლიენტების ნაკადი – 20 კვადრატულ მეტრზე დასაშვებია ერთი მყიდველი.
სოფო ელოშვილის განცხადებით, სავაჭრო ცენტრის თანამშრომლები მთავრობის დადგენილ ყველა რეგულაციას იცავენ.
„ჩვენი გუნდით სრულად მობილიზებული ვართ, რათა ყველანაირად გავაკონტროლოთ და დავიცვათ მთავრობის მიერ დადგენილი ყველა რეგულაცია. მინდა ვთხოვო ჩვენს მომხმარებელს, თუ არ არის გადაუდებელი აუცილებლობა, თავი შეიკავონ მოლებში მისვლისგან“, – განაცხადა სოფო ელოშვილმა.
აღსანიშნავია, რომ „სითი მოლის“ მომხმარებელს კორონავირუსის სიმპტომებს შეუმოწმებს და რეკომენდაციებს გააცნობს ორი რობოტი „პეპერი“.
მეტი უსაფრთხოებისთვის დილის შვიდი საათიდან, სავაჭრო ობიექტებთან ერთად, შრომის ინსპექციაც შეუდგა მუშაობას. ობიექტების მონიტორინგში მათთან ერთად აქტიურად არიან ჩართული ფინანსური პოლიცია, შემოსავლების სამსახური და საპატრულო პოლიცია.
შეიცვალა სავაჭრო ცენტრების მუშაობის გრაფიკიც – ის 07:00-დან 19:00 საათამდე განისაზღვრა. ცენტრების ტერიტორიაზე არ იფუნქციონირებს კვების ობიექტები და გასახდელები.