თბილისი, 7 დეკემბერი — Sputnik. ინდოეთის ჯანდაცვის სამინისტრომ სპეციალური ჯგუფი შექმნა ქალაქ ელურუში უცნობი დაავადების ასობით შემთხვევის გამოსაძიებლად, იუწყება სააგენტო РИА Новости სამინისტროს მემორანდუმზე დაყრდნობით.
როგორც დოკუმენტშია ნათქვამი, სამთავრობო ჯგუფი სასწრაფოდ მიემგზავრება ანდჰრა–პრადეშის შტატის ქალაქ ელურუში მომხდარის შესასწავლად.
ჯგუფში შედის სამი ექიმი, რომლებსაც დავალებული აქვთ, უკვე სამშაბათს, დილით იყვნენ ელურუში და ანგარიში იმავე დღის საღამოს წარმოადგინონ.
უცნობმა დაავადებამ ქალაქ ელურუსა და მის გარეუბნებში კვირას იფეთქა, რა დროსაც დაიღუპა ერთი ადამიანი, ხოლო 300-ზე მეტი საავადმყოფოებში გადაიყვანეს. პაციენტები უჩიოდნენ თავბრუსხვევას, ეპილეფსიის სიმპტომებს – მოულოდნელ გულყრებს, კანკალსა და პირში ქაფს. ამ დროისათვის საავადმყოფოებში კვლავ რჩება 150-მდე ადამიანი. მათგან ხუთი გაფართოებული კვლევებისთვის ვიჯაიავადის სახელმწიფო კლინიკაში გადაიყვანეს.
სისხლისა და ზურგის ტვინის სითხის ანალიზმა, ასევე კომპიუტერულმა ტომოგრაფიამ დაავადების მიზეზები არ გამოავლინა. ამასთან გამოცემა Times of India წერდა, რომ ამის მიზეზი შესაძლებელია კოღოებისგან დამცავი ტოქსიკური ნაერთების ანაორთქლი იყოს.