თბილისი, 5 დეკემბერი - Sputnik. „საქართველოს სამედიცინო ასოციაციების გაერთიანება“ COVID-19-ით ინფიცირებულ პაციენტებს უფასო ონლაინ კონსულტაციას სთავაზობს.
ინფიცირებულებს შეუძლიათ ექიმებს ონლაინ დაუკავშირდნენ და პასუხი წერილობით მიიღონ, საჭიროების შემთხვევაში კი პაციენტთან სატელეფონო კომუნიკაციაც მოხდება.
„ეს იქნება ძალიან მარტივი და მოხერხებული ონლაინსერვისი. პაციენტს „სამედიცინო ასოციაციების გაერთიანების“ ვებგვერდზე შეეძლება აკრიფოს მოკლე შეკითხვა, რომელიც გადამისამართდება შესაბამის სპეციალისტთან“, - განაცხადა „საქართველოს ექიმთა ასოციაციის“ წევრმა არჩილ ჩხოტუამ.
ჩხოტუას განცხადებით, ამ სერვისთან დაკავშირებით ინფორმაცია ჯანდაცვის სამინისტროსაც აქვს.
ქვეყანაში COVID-19-ის პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობა შეადგენს 158 154-ს. ბოლო 24 საათში გამოჯანმრთელდა 2 306 პირი, ხოლო ჯამში გამოჯანმრთელებულთა რაოდენობა გაიზარდა – 129 210-მდე. გასულ დღე-ღამეში კორონავირუსით გარდაცვალების 37 ახალი შემთხვევა დაფიქსირდა. 2020 წლის 26 თებერვლიდან დღემდე სულ 1 462 ადამიანი გარდაიცვალა.