თბილისი, 26 ნოემბერი – Sputnik. ოპოზიციური მოძრაობის „ხალხისთვის“ ლიდერმა ანა დოლიძემ „მადლიერების მარში“ გამართა და თავის მხარდამჭერებს დიდუბე-ჩუღურეთის რაიონში მადლობა ასე გადაუხადა, იუწყება „Sputnik–საქართველოს“ კორესპონდენტი.
ანა დოლიძემ დიდუბე–ჩუღურეთის მაჟორიტარულ ოლქში საპარლამენტო არჩევნებში ხმების 17,95%-ით მესამე ადგილი დაიკავა და მეორე ტურში ვერ გადავიდა. ხმების უმრავლესობა მიიღო „ქართული ოცნების“ კანდიდატმა გია ვოლკიმ, ხოლო მეორე ადგილი ოპოზიციური „გირჩის“ კანდიდატმა ზურაბ ჯაფარიძემ დაიკავა.
დღევანდელი მსვლელობა დაიწყო და დასრულდა იმ უბნებთან, სადაც ანა დოლიძემ ყველაზე დიდი მხარდაჭერა მოიპოვა. ღონისძიების ფარგლებში მან და მისი გუნდის წევრებმა საარჩევნო პლაკატები ჩამოხიეს და კამპანიის დროს გამოყენებული ტერიტორიები დაალაგეს.
„პირველად ჩვენს პოლიტიკურ ისტორიაში ჩვენ დავბრუნდით იმ ხალხთან, ვინც მხარი დაუჭირა ჩემს კამპანიას და მე, დავბრუნდით იმისთვის, რომ გადამეხადა მადლობა მხარდაჭერისთვის, რომელიც ჩუღურეთელებმა და დიდუბელებმა გამომიცხადეს 31 ოქტომბერს. მიუხედავად გაყალბებისა, ამ უბნებმა გამოგვიცხადეს მხარდაჭერა და ამ ხალხს ეკუთვნის მადლობა. ჩვენ ჩამოვხსნით პლაკატებს, რომლებიც გავაკარით საარჩევნო კამპანიის დროს, რადგან ხალხისთვის მნიშვნელოვანია ქალაქის იერსახე“, – განაცხადა ანა დოლიძემ.
მისი თქმით, მოძრაობა გამოიჩენს პასუხისმგებლობას და დაალაგებენ იმ წერტილებს, რომლებიც საარჩევნო კამპანიის დროს გამოიყენეს.
საქართველოს საარჩევნო კოდექსით, წინასაარჩევნო პლაკატები არჩევნების ჩატარების შემდეგ 15 დღის განმავლობაში უნდა ჩამოიხსნას.