თბილისი, 25 ნოემბერი - Sputnik. 1986 წლის ფეხბურთის მსოფლიო ჩემპიონი, არგენტინელი დიეგო მარადონა, რომელიც ყველა დროის ერთ-ერთ უდიდეს ფეხბურთელადაა მიჩნეული, 60 წლის ასაკში გარდაიცვალა, იუწყება The Guardian.
მისი ადვოკატის ინფორმაციით, სახელოვანი არგენტინელი საკუთარ სახლში გულის შეტევით გარდაიცვალა.
ფეხბურთელი საავადმყოფოში გამოსაკვლევად 30 ოქტომბერს დააწვინეს, მაგრამ, როგორც მოგვიანებით გაირკვა, მას ტვინზე ოპერაცია ჩაუტარდა. მარადონა კლინიკიდან 12 ნოემბერს გაწერეს.
ცნობილია, რომ დიეგო მარადონას ნარკოდამოკიდებულების გამო გული აწუხებდა.
გულზე ჩივილებით 2000 და 2004 წლებში ფეხბურთელი საავადმყოფოშიც იწვა. მოგვიანებით მან კუჭის ოპერაციაც გადაიტანა, რათა სიმსუქნე შეეჩერებინა.
მარადონა ხუთჯერ დასახელდა წლის სამხრეთ ამერიკელ ფეხბურთელად, 2000 წელს კი მიიღო FIFA-ს „საუკუნის მოთამაშის“ წოდება ინტერნეტგამოკითხვის და ფედერაციის ოფიციალური პირების, მწვრთნელებისა და მოთამაშეების ნომინაციის შედეგად. არგენტინელი საპატიო „ოქროს ბურთის“ პირველი მფლობელიცაა.