ინდოეთში კორონავირუსით ინფიცირების შემთხვევათა რეკორდული რაოდენობა დაფიქსირდა

თბილისი, 12 სექტემბერი - Sputnik. ინდოეთში გასულ დღე-ღამეში მედიკოსებმა კორონავირუსის 97,5 ათასზე მეტი შემთხვევა გამოავლინეს - ეს ქვეყანაში პანდემიის დაწყებიდან დაავადებულთა რაოდენობის მატების ყველაზე მაღალი მაჩვენებელია.

ამას ადასტურებს ინდოეთის ჯანდაცვისა და ოჯახური კეთილდღეობის სამინისტროს მონაცემები.

ქვეყანაში ზედიზედ მესამე დღეა COVID-19-ის დადასტურებული მატარებლების რიცხვი რეკორდულ ნიშნულებს აღემატება - ხუთშაბათს გავრცელდა ინფორმაცია 95,7 ათას შემთხვევაზე, პარასკევს - 96,5 ათასის შესახებ.

ამ დროისათვის კორონავირუსით ინფიცირების დადასტურებული შემთხვევების რაოდენობით ინდოეთი მსოფლიოში მეორე ადგილს იკავებს. ჯანდაცვის სამინისტროს ბოლო მონაცემებით, ქვეყანაში სულ 4,66 მილიონი ადამიანია გამოვლენილი.

ინდოეთის ჯანდაცვის სამინისტროს ინფორმაციით, გამოჯანმრთელებულთა რაოდენობა საერთო დაავადებულთა რიცხვიდან 77,77%-ს აღწევს და 3,62 მილიონ ადამიანს აჭარბებს. კლინიკებში მკურნალობას 958 ათასი ადამიანი გადის (დაავადებულთა 20,56%). ერთ დღე-ღამეში ეს რიცხვი 14 ათასით გაიზარდა.

ბოლო მონაცემებით, კორონავირუსის მსხვერპლთა რიცხვი 77,4 ათასს აჭარბებს და გამოვლენილი შემთხვევების საერთო რაოდენობის 1,66%-ს შეადგენს. ერთ დღე-ღამეში ვირუსისგან 1201 ადამიანი გარდაიცვალა.