თბილისი, 27 აგვისტო — Sputnik. რიგით 82-ე საზოგადოებრივი ცენტრი გაიხსნა დღეს ბაღდათის მუნიციპალიტეტში.
ცენტრის გახსნის ცერემონიაში მონაწილეობა მიიღო საქართველოს ვიცე-პრემიერმა, იუსტიციის მინისტრმა თეა წულუკიანმა.
საზოგადოებრივი ცენტრები – იუსტიციის სახლების პროტოტიპებია. საზოგადოებრივი ცენტრები რეგიონების მოსახლეობას, მომხმარებელს მრავალფეროვან სერვისს, გამარტივებულ პროცედურებს, საინფორმაციო ტექნოლოგიების ხელმისაწვდომობას და თანამედროვე ინფრასტრუქტურას სთავაზობენ.
ბაღდათში საზოგადოებრივი ცენტრი – ეს არის თანამედროვე შენობა, რომლის ინფრასტრუქტურა ადაპტირებულია შშმ პირებისთვის. აღნიშნულ ცენტრში ადგილობრივი მოსახლეობა შეძლებს კომფორტულ გარემოში სწრაფად, რაიონიდან გაუსვლელად ისარგებლოს სახელმწიფო და კერძო სექტორის 200-ზე მეტი მომსახურებით.
საზოგადოებრივ ცენტრში იმუშავებს სახელმწიფო სერვისების განვითარების სააგენტო, რომელიც გასცემს პირადობის, ქორწინების მოწმობებსა და ბევრ სხვა დოკუმენტს, შეძლებს ქონების დარეგისტრირებას და ა.შ. გარდა ამისა, საზოგადოებრივ ცენტრში განთავსდება ბანკების ფილიალები.