გასულ კვირაში რუსულმა ჰაერსაწინააღმდეგო თავდაცვის სისტემებმა აღმოაჩინეს და გააცილეს 46 უცხოური თვითმფრინავი და უპილოტო საფრენი აპარატი, რომლებიც დაზვერვას აწარმოებდნენ რუსეთის ფედერაციის საზღვრებთან. ამის შესახებ გაზეთი „კრასნაია ზვეზდა“ წერდა რუსეთის თავდაცვის სამინისტროზე დაყრდნობით. ქვეყნის საჰაერო საზღვრების დარღვევა დაუშვებელია, მაგრამ ამგვარი „სტუმრების“ რაოდენობა განუხრელად იზრდება. პენტაგონი ასე ამუშავებს სტრატეგიას, ტაქტიკასა და „არაპროგნოზირებადი დარტყმის“ ტექნოლოგიურ ალგორითმებს. რუსეთი იძულებულია რეაგირება მოახდინოს და სავარაუდო აგრესორის კუთვნილი დრონების კონტროლისა და განადგურების კიდევ უფრო ეფექტური საშუალებები შექმნას.
მთავრდება საზენიტო-სარაკეტო სისტემა С-500 „პრომეთეოსის“ გამოცდა, რა დროსაც რაკეტამ რეკორდულ მანძილზე, 553 კმ-ზე დააზიანა სამიზნე. თავდაცვის მინისტრმა სერგეი შოიგუმ პირობა დადო, რომ სისტემის მიწოდება ჯარებში 2020 წელს დაიწყება.
მანამდე სამხედრო-კოსმოსური ძალების მთავარსარდალმა სერგეი სუროვიკინმა განაცხადა: „საზენიტო-სარაკეტო სისტემა С-500-ის მახასიათებლები იძლევა საშალებას, გარდა აეროდინამიკული და ბალისტიკური სამიზნეებისა, ასევე განადგურდეს ყველა მოდიფიკაციის ჰიპერბგერითი იარაღი, მათ შორის, ახლო კოსმოსში“.
ჰაერსაწინააღმდეგო თავდაცვის უნიკალური კომპლექსი С-500 „პრომეთეოსი“ უნივერსალურ სისტემა „ხმელეთი-ჰაერს“ განეკუთვნება, რომელსაც აქვს რაკეტსაწინააღმდეგო თავდაცვის მაღალი პოტენციალი და აქვს უნარი, გაანადგუროს ყველა საჰაერო სამიზნე ― ბალისტიკური, აეროდინამიკული, ჰიპერბგერითი ― დღეისათვის უკვე მიღწეულ და პერსპექტიულ ყველა სიჩქარეზე. აუცილებლობის შემთხვევაში „პრომეთეოსს“ შეუძლია „ოთხ წამში“ ჩამოაგდოს F-35. მოქმედების ეფექტურობით მას ანალოგი არ აქვს მსოფლიოში და უახლოეს ათწლეულში არც ექნება.
საზღვაო ჰორიზონტები
„პრომეთეოსი“ დაეხმარება „ტრიუმფს“ და რუსეთის ფედერაციის ჰაერსაწინააღმდეგო და რაკეტსაწინააღმდეგო ერთიანი სისტემის ღერძი გახდება. ეს იმას ნიშნავს, რომ პოტენციური მოწინააღმდეგის ხილული და უხილავი დაზვერვითი და შემტევი თვითმფრინავები მიზანში რუსეთის საზღვრიდან 600 კმ-ში იქნება ამოღებული.
შავი ზღვის მიმართულებით С-500-ის სისტემები ყირიმიდან, წმინდა ჰიპოთეტურად, შეძლებენ ჩამოაგდონ აგრესორის სტრატეგიული ბომბდამშენები ბუქარესტის, ანკარისა თუ კიევის თავზე (ყველა ამ შემთხვევაში სამიზნემდე მანძილი 550 კმ-ზე ნაკლები არ იქნება).
ბალტიის ზღვის რეგიონში სამხედრო კონფლიქტის შემთხვევაში რუსეთი გააძლიერებს ბალტიის თავზე არსებულ არასაფრენ ზონაში ტექნოლოგიურ უნარებს. კალინინგრადის ოლქში განთავსებული „პრომეთეოსი“ შეძლებს საიმედოდ გააკონტროლოს საჰაერო სივრცე მთელი პოლონეთის, გერმანიის ნაწილის, დანიის (კოპენჰაგენის ჩათვლით), ჩეხეთისა და სლოვაკეთის თავზე. ამგვარად, С-500 საკმაოდ სწრაფად გააუფასურებს ამერიკული ჯარების განთავსებას პოლონეთის ტერიტორიაზე და ვაშინგტონისა და ვარშავის სამხედრო პარტნიორობის გაფართოებას. მეორე მხრივ, ახალი რუსული საზენიტო-სარაკეტო სისტემა საიმედოდ გადაკეტავს საჰაერო სივრცეს მოკავშირე ბელარუსის თავზე.
ამერიკული ჟურნალი The National Interest განგაშით აკვირდება „პრომეთეოსის“ გამოცდებს და იუწყება: „ეს ახალი თაობის იარაღია, რომლის დანიშნულებაც ისაა, რომ გააძლიეროს ისედაც ძლიერი С-400 სისტემა, რომელიც მოსკოვს აქვს... С-500-ს აქვს მაღლივი სამიზნეების განადგურების უპრეცედენტო შესაძლებლობები შორ მანძილზე, და შეუძლია ებრძოლოს „სტელსის“ ტექნოლოგიით შექმნილ თვითმფრინავებს“.
პენტაგონისთვის ეს მართლაც უსიამოვნო „აღმოჩენაა“ ― თითოეული კომპლექსით ათი სამიზნის ერთდროული განადგურების 600-კილომეტრიანი ზღვარი. რა თქმა უნდა, უახლესი რუსული სისტემა შეამცირებს აშშ-ის და მისი მოკავშირეების სამხედრო-საჰაერო ძალების თავისუფლების ხარისხს ბალტიისა და შავი ზღვების თავზე. კალინინგრადის ოლქიდან С-500 საბრძოლო ვითარებაში შეძლებენ გაანადგურონ ფრთოსანი რაკეტები და „უხილავი“ F-35-ები შორ მანძილზე. თუმცა, თუ ამერიკელი მფრინავები „წითელ ხაზს“ არ გადაკვეთენ ყირიმში, კალინინგრადისა თუ ლენინგრადის ოლქებში, ასევე რუსეთის სხვა რეგიონებში, ყოველდღიურად არ „გამოეკიდებიან ჰაერში“ აღმოსავლეთ ევროპის მშვიდობიანი რეგიონების თავზე, მათ არაფერი ექნებათ სანერვიულო. „პრომეთეოსი“ მხოლოდ დაცვისთვისაა შექმნილი საგარეო აგრესიის შემთხვევაში, რათა ეფექტურად განახორციელოს „იძულებითი მშვიდობა“.
კოსმოსური სიმაღლეები
სამხედრო სტრატეგიები და კონფლიქტები ტექნოლოგიურად სულ უფრო რთული ხდება. დედამიწის ორბიტაზე დაზვერვისა და ნავიგაციის ბევრი სისტემაა გაყვანილი. აშშ-ის კოსმოსურმა ძალებმა არც ისე დიდი ხნის წინ „არამეგობარი სახელმწიფოების“ თანამგზავრული დაჯგუფებებისა და შეტევითი ოპერაციების „ნეიტრალიზაციის“ მისიები დაგეგმეს. პენტაგონი კოსმოსში ოპერაციებს საბრძოლო მოქმედებების ცალკე სფეროდ განიხილავს, ამიტომ ადრე თუ გვიან განათავსებს დედამიწის ახლო ორბიტაზე შეტევით შეიარაღებას (კინეტიკურს, ლაზერულსა თუ ელექტრომაგნიტურს). შეერთებული შტატები უკვე დიდი ხანია ამუშავებენ თავდასხმის კოსმოსურ საშუალებებს და შეუძლიათ რუსეთის წინააღმდეგ გამოიყენონ ის.
ჰოლივუდური სცენარით „ვარსკვლავურ ომებში“ მონაწილეობა რუსეთს არაფერში სჭირდება. „პრომეთეოსების“ სახმელეთო ქსელი, რომელიც სწრაფად მოხსნის ორბიტულ საფრთხეებს, ნებისმიერ „ვარსკვლავურ ფლოტზე“ ოპტიმალურად და ეფექტურად გამოიყურება.
С-500-ის ტექნოლოგიები სამხედრო საქმეში ახალ ჰორიზინტებს შლის და პირდაპირ გავლენას ახდენს ახლო კოსმოსსა და გლობალურ გეოპოლიტიკაზე. ამასთან რუსეთსა და პოსტსაბჭოთა სივრცეში არავინ იტყვის უარს ინტეგრირებულ, ღრმად ეშელონირებულ ჰაერსაწინააღმდეგო და რაკეტსაწინააღმდეგო სისტემებზე. С-500, С-400 და С-300 ეფექტურად დაიცავს რუსეთის საჰერო სივრცეს სხვადასხვა საფრთხეებისგან.
და ბოლოს: С-500-ის შესაძლებლობები მნიშვნელოვნად აღემატება С-400-ის შესაძლებლობებს, რომ აღარაფერი ვთქვათ ამერიკულ ანალოგ Patriot Advanced Capability-3-ზე. ამასთან, ეგვიპტური გამოცემა Sasapost-ის ინფორმაციით, უახლესი რუსული სისტემები შეიძლება დაახლოებით 500 მლნ დოლარი ღირდეს მაშინ, როდესაც Patriot-ის ფასი ერთი მილიარდი დოლარია, ხოლო THAAD-ის ― 3 მლრდ დოლარი. მობილურ „პრომეთეოსს“ შეუძლია წარმატებული გახდეს შეიარაღების საერთაშორისო ბაზარზე.
რედაქცია შესაძლოა არ ეთანხმებოდეს ავტორის მოსაზრებებს