თბილისი, 6 აგვისტო ― Sputnik. აშშ-ის პოლიციამ პრეზიდენტ დონალდ ტრამპის მარ-ა-ლაგოში (ფლორიდა) მდებარე მამულის ტერიტორიაზე სამი მოზარდი დააკავა, რომლებსაც ზურგჩანთაში იარაღი და 14 ვაზნა აღმოაჩნდათ, იუწყება სააგენტო AP News.
გავრცელებული ინფორმაციით, მოზარდები პრეზიდენტის მამულში მაშინ მოხვდნენ, როდესაც პოლიციისგან გაქცევას ცდილობდნენ.
ირკვევა, რომ გასული კვირის ბოლოს პოლიციელებმა მარ-ა-ლაგოდან სამ კილომეტრში გაჩერებულ ავტომობილში სამი 15 წლის ბიჭი შენიშნეს, რომლებიც მათი დანახვისთანავე გაქცევას შეეცადნენ. მაგრამ მათ პოლიციის სხვა ავტომობილმა გადაუღობა გზა, რის შემდეგაც ბიჭები მანქანიდან გადახტნენ, მარ-ა-ლაგოს ღობეზე გადაძვრნენ და მიმალვა სცადეს.
სამართალდამცველებმა ვერტმფრენისა და პოლიციის ძაღლის მეშვეობით მალევე იპოვეს მოზარდები, თუმცა მათ უკვე მოესწროთ ზურგჩანთის გადაგდება, რომელშიც კალაშნიკოვის ავტომატი АК-47 და 14 ვაზნა ელაგა.
„ბიჭებს წარმოდგენა არ ჰქონდათ, სად ამოყვეს თავი... გაუმართლათ, რომ მამულში იმ მომენტში პრეზიდენტი და მისი ოჯახის წევრები არ იმყოფებოდნენ, თორემ მოზარდებს საიდუმლო სამსახურის შეიარაღებულ აგენტებთან მოუწევდათ შეხვედრა“, — აღნიშნა პალმ–ბიჩის პოლიციის წარმომადგენელმა მაიკლ ოგროდნიკმა.
ამ დროისათვის მოზარდები დაკავებული არიან და სასამართლოს გადაწყვეტილებას ელოდებიან.