თბილისი, 21 ივლისის — Sputnik. ახალი კორონავირუსული ინფექციის საწინააღმდეგო ვაქცინა რუსეთში უკვე მზადაა, განაცხადა ქვეყნის თავდაცვის მინისტრის პირველმა მოადგილემ რუსლან ცალიკოვმა.
მანამდე ცნობილი გახდა, რომ რუსული ვაქცინის კლინიკური გამოცდები დასრულდა და მასში მონაწილე ყველა მოხალისე შინ გაეწერა. თავდაცვის უწყებაში აღნიშნეს, რომ, შედეგების თანახმად, ტესტების ყველა მონაწილეს ერთმნიშვნელოვნად გამოუმუშავდა იმუნური პასუხი.
სეჩენოვის უნივერსიტეტის სამკურნალო პრეპარატების კლინიკური შესწავლის ცენტრის ხელმძღვანელმა ელენა სმოლიარჩუკმა რამდენიმე დღის წინ ასევე აღნიშნა, რომ კორონავირუსის მიმართ იმუნიტეტი ყველა იმ მოხალისეს გამოუმუშავდა, რომლებმაც საკუთარ თავზე გამოსცადეს ვაქცინა ამ დაწესებულებაში.
მისი თქმით, იმუნური სისტემის რეაქციის დაწყებიდან სამი კვირის შემდეგ, ორგანიზმის ვირუსისგან დაცვის თვალსაზრისით, მაქსიმუმი დგება.
ამასთან, სმოლიარჩუკის განმარტებით, რამდენ ხანს შენარჩუნდება იმუნიტეტი, ამის თქმა ჯერჯერობით ძნელია. აღნიშნულ კითხვას პასუხი მეცნიერებმა კლინიკური გამოცდების შემდგომ ფაზაში უნდა გასცენ.