თბილისი, 5 ივლისი — Sputnik. წყალტუბოს მუნიციპალიტეტის სოფელ ნამოხვანის მოსახლეობა ჰესის მშენებლობას აპროტესტებს, იუწყება საზოგადოებრივი მაუწყებლის პირველი არხი.
აქციას შეუერთდნენ ეკოლოგები, ახალგაზრდა იურისტები, სამოქალაქო აქტივისტები და პარტია „თავისუფალი საქართველოს“, „ლეიბორისტული პარტიის“ და გაერთიანებული ოპოზიციის წარმომადგენლები.
ადგილობრივი მოსახლეობის საპროტესტო აქცია ამ წუთებში მიმდინარეობს. აქციის მონაწილეები „ნამახვანის ჰესების კასკადის“ მშენებლობის ნებართვის გაუქმებას ითხოვენ.
ადგილობრივები ფიქრობენ, რომ გარემოზე ზემოქმედების შედეგების არსებული დოკუმენტი ვერ ასახავს რეალობას და ამ დოკუმენტის ახლიდან შემუშავებას ითხოვენ. აქციის მონაწილეების განცხადებით, პროექტი ეკოსისტემას, სამეურნეო დარგებს და ადამიანების ჯანმრთელობას დააზიანებს.
„აქ არის ისეთი უნიკალური ჯიშის ვაზი, როგორიცაა ტვიში, უსახელოური და ხვანჭკარა. ტენიანობის მომატება კი მათ უნიკალურობას დაუკარგავს. აქედან 20 კილომეტრში მდებარეობს ქუთაისი და კაშხლის დაზიანების შემთხვევაში, 19 წუთში ქალაქს 34 მეტრიანი ტალღა დაარტყამს“, - განმარტავენ ადგილობრივები.
აქციის დაწყებამდე ლენტეხის და ქუთაის-გაენათის ეპარქიის სასულიერო პირებმა ერთობლივი პარაკლისი აღავლინეს.