თბილისი, 1 ივლისი — Sputnik. თიანეთის მუნიციპალიტეტში ციმბირის წყლულით საქონლისა და მათი პატრონის დაინფიცირების შემთხვევა გამოვლინდა, იუწყება ტელეკომპანია „რუსთავი2".
ინფიცირებულია 50 წლის მამაკაცი, რომელიც საავადმყოფოშია მოთავსებული.
„ეს შემთხვევა დაფიქსირდა ლოკალურად ერთ ოჯახში. ამ ოჯახში გატარდა შესაბამისი ღონისძიებები. ეს გულისხმობს პირველ რიგში ბიოლოგიური უსაფრთხოების დაცვით ნიმუშების აღებას, ლაბორატორიაში გადაგზავნას, ადგილზე დეზინფექციის ჩატარებას და, რა თქმა უნდა, ცხოველების იმუნიზაციას, არა მხოლოდ იმ ოჯახში, არამედ მთელ სოფელში და მის მომიჯნავე სოფლებში", – განაცხადა სურსათის ეროვნული სააგენტოს მცხეთა-მთიანეთის რეგიონული სამმართველოს უფროსმა ნიკოლოზ ტყებუჩავამ.
ამ ტერიტორიიდან ხორცისა და რძის ნაწარმის მოწოდება დროებით შეწყდა.