თბილისი, 23 ივნისი — Sputnik. ახალი ტიპის კორონავირუსის განსაკუთრებით მძიმე ფორმების სამკურნალოდ „დექსამეტაზონის“ წარმოება უნდა გაიზარდოს, განაცხადა ჯანდაცვის მსოფლიო ორგანიზაციის დირექტორმა ტედროს ადანომ გებრეიესუსმა.
„ცოტა ხნის წინ ჩატარებულმა კვლევებმა აჩვენა, რომ სტეროიდულ პრეპარატ „დექსამეტაზონს“ COVID-19-ის კრიტიკული ფორმით დაავადებული პაციენტების გადარჩენის პოტენციალი აქვს, რაც სიხარულის მიზეზს გვაძლევს. შემდეგი გამოწვევა არის „დექსამეტაზონის“ წარმოების გაზრდა და მისი სწრაფი და თანაბარი განაწილება მთელ მსოფლიოში“, — აღნიშნა ჯანმოს ხელმძღვანელმა.
გებრეიესუსმა ხაზი გაუსვა, რომ ბრიტანეთში კორონავირუსის მკურნალობაში „დექსამეტაზონის“ წარმატებული გამოცდის შემდეგ მასზე მოთხოვნა მსოფლიოში უკვე გაიზარდა.
„საბედნიეროდ, ეს ძვირადღირებული წამალი არ არის და მსოფლიოში „დექსამეტაზონის“ უამრავი მწარმოებელი არსებობს, რომლებიც დარწმუნებული არიან, რომ შეძლებენ წარმოების გაზრდას“, — განმარტა ჯანმოს ხელმძღვანელმა.
„დექსამეტაზონს“ უკვე ნახევარ საუკუნეზე მეტია იყენებენ ანთების საწინააღმდეგო საშუალებად. გარდა ამისა, ის ასევე გამოიყენება ონკოლოგიაშიც.
აღსანიშნავია, რომ „დექსამეტაზონი“, რომელიც დადებით შედეგებს აჩვენებს COVID-19-ის მძიმე ფორმების მკურნალობისას, მსუბუქი ფორმით მიმდინარე დაავადების შემთხვევაში იგივე ეფექტი არ ჩანს.