თუმცა, სანამ მსოფლიოში მეცნიერები ვარაუდების დონეზე მსჯელობენ, საქართველოში 89 წლის ბიოლოგი ავთანდილ კურდღელაძე, რომელსაც კახეთში ლაბორატორია აქვს, აცხადებს, რომ კორონავირუსის პრევენციისთვის გამოიგონა წამალი და მას „კორვირანტი“ უწოდა. ასევე შექმნა სპეციალური სადეზინფექციო ხსნარი სახელად „ვარაზი“.
ბატონი ავთანდილისთვის ეს არ გახლავთ „დებიუტი“ ფარმაკოლოგიაში. ის დღემდე 36 პრეპარატის ავტორია, საიდანაც ლიცენზირებული, ანუ სააფთიაქო ქსელში შესულია – სამი. ამის მიზეზი მარტივი ასახსნელია – ნებისმიერი პრეპარატის გამოსაკვლევად გარკვეული რაოდენობის თანხაა საჭირო. იმედია, ბატონი ავთანდილის მიერ კორონავირუსის პრევენციისთვის გამოგონილი პრეპარატით ქართველი სპეციალისტები დაინტერესდებიან.
- ბატონო ავთანდილ, თქვენ აცხადებთ, რომ გამოიგონეთ პრეპარატი კორონავირუსის პრევენციისთვის. კონკრეტულად რა პრეპარატზეა საუბარი?
- დიახ, კორონას პრევენციისთვის შევქმენი პრეპარატი, სახელად „კორვირანტი“, რომელიც ჯერჯერობით არც ერთ აფთიაქში არაა შეტანილი. წამლის გამოსაცდელად დიდი თანხაა საჭირო, რაც ჩვენ არ გაგვაჩნია, ამიტომ ამის უფლებას არ იძლევიან. გარდა „კორვირანტისა“, რომელიც პრევენციისთვის გამოვიგონე, არის კიდევ პრეპარატი „ანტიკორი“ და სადეზინფექციო ხსნარი „ვარაზი“. ეს დეზინფექციისთვის შექმნილი მცენარეული საშუალებაა.
- გარდა ამისა, თქვენ 36 პრეპარატის ავტორი ხართ და, როგორც ვიცით, ყველა წამალს საკუთარ თავზე ცდით, ასეა?
- დიახ, სიმართლეა, 36 პრეპარატი მაქვს გამოგონებული. რომ გავიგო მაწყენს თუ მარგებს, მათ პირველად საკუთარ თავზე ვცდი ხოლმე, რათა დავრწმუნდე, რომ ისინი ალერგიული და ტოქსიკური არ არის. აქამდე რომელი წამალიც შევქმენი, ყველამ გაამართლა. ადრე პრესაში დავწერე, მე ჩემი სათქმელი ვთქვი, ახლა ჯერ ექიმებზეა–მეთქი და იგივეს დღესაც ვიმეორებ.
- რამდენადაც ვხვდები, ამ პრეპარატის მთავარი მიზანი იმუნიტეტის მოძლიერება უნდა იყოს?
- რა თქმა უნდა, კორონას პრევენციისთვის ძირითადი მაინც იმუნიტეტის მოძლიერება უნდა გახდეს. როცა ადამიანს იმუნიტეტი აქვს ძლიერი, მას ვირუსი ნაკლებად მოერევა. გარდა მაგისა, შეიძლება იმუნიტეტი ძლიერი გქონდეს, მაგრამ თუ სხვა სახის დაავადებებიცაა, პარალელურად მათაც უნდა ვებრძოლოთ.
- კონკრეტულად როგორ მოქმედებს თქვენი პრეპარატი?
- ჩემი წამალი სასუნთქ გზებს ათავისუფლებს, რათა ადამიანმა ადვილად ისუნთქოს. ის ნახველს ათხელებს, რომ ავადმყოფმა ადვილად ამოიღოს.
- თქვენ მიერ აქამდე გამოგონილი 36 პრეპარატიდან რომელია ლიცენზირებული?
- ეს არის პრეპარატი სახელად „ბარამბო“, რომელიც ნერვიული სისტემის მოშლის, უძილობისა და შიშების საწინააღმდეგო საშუალებაა. ის 2002 წელს შევიდა ჩვენს აფთიაქებში. ეს სწორედ ის პრეპარატია, რომელიც მთელ მსოფლიოს სჭირდება. იმდენად დიდი იყო მასზე მოთხოვნა, რომ თავის დროზე ჩემთან მოვიდა ორი ადამიანი და მათ შემომთავაზეს 450 000 დოლარი, რათა ეს პრეპარატი მიმეყიდა. რაზეც მე უარი განვაცხადე. სულ მალე კი გავიგე, რომ მათ ფალსიფიცირებული პრეპარატი გამოუშვეს. თავის დროზე ამ ფაქტზე ტელევიზიაში ბევრი ითქვა, ამიტომ იძულებული გავხდი, რომ პრეპარატის დამზადება შემეჩერებინა.
- ბოლო დროს თქვენი რომელი პრეპარატი შევიდა საქართველოს სააფთიაქო ქსელში?
- ბოლოს შევიდა ჩემი „ბარამბო-კომბი“, ანუ კომბინირებული, კუჭ-ნაწლავის დაავადების სამკურნალო წამალი „მეოხი“, და რეგისტრირდება და მალე ქსელში შევა მალამო, სახელად „უებარი“, რომელიც კანის პათოლოგიებს, ბუასილს, დამწვრობას, მოტეხილობას და ამ ტიპის სხვა დაავადებებს კურნავს. აფთიაქში ჯერჯერობით მხოლოდ ჩემი ეს სამი პრეპარატია შესული.
- საქართველო მდიდარი სამკურნალო ფლორით გამოირჩევა, მაგრამ ბევრი მათგანი ჯერაც შეუსწავლელია...
- მცენარეები უფრო გონიერი და მოაზროვნე არსებები არიან, ვიდრე ცხოველები და ადამიანები. ჯერჯერობოთ ჩვენი მეცნიერება იმდენად სუსტია, რომ მცენარეების საიდუმლოს ვერ ჩაწვდა. როგორც კი ჩაწვდება, მაშინ, დარწმუნებული ვარ, საერთოდ შეცვლის თავის ცხოვრებას. მსოფლიოში სულ 15 ტიპის ნიადაგია, აქედან საქართველოში 12 ტიპის ნიადაგია, ამდენი არც ერთ ქვეყანაში არ არის. ამასთან კლიმატური პირობები და გეოგრაფიული მდებარეობაც ისეთი აქვს საქართველოს, რომ აქ არსებული მცენარეების სამკურნალო ეფექტი ბევრად უფრო დიდია, ვიდრე იმავე მცენარეებისა სხვა ქვეყანაში.
- თავიდან ყველა წამლის საფუძველი მცენარეული იყო და რატომ ჩაანაცვლა ის ქიმიურმა პრეპარატებმა?
- დიახ, ეს იყო ადრე, როცა მედიცინა შეიქმნა. ადამიანი დაახლოებით 70 მიკრო- და მაკროელემენტს შეიცავს. ვინაიდან მცენარეებშიც იგივე ელემენტებია, რაც ქიმიურ ნივთიერებებში, მედიცინამ ქიმიური პრეპარატების გამოყენება ამჯობინა, რადგან ეს უფრო მარტივი და ადვილია. ამიტომ პრეპარატებისთვის არა მცენარეების, არამედ ქიმიის გამოყენება არჩიეს.
- ბოლოს, ისევ კორონას რომ დავუბრუნდეთ, სხვადასხვა ვერსიები არსებობს და, თქვენი აზრით, რა სახის ვირუსია ეს?
- ჩემი აზრით, ეს ადამიანის მიერ ხელოვნურად შექმნილი ვირუსია – ესაა ბიოლოგიური ომი ადამიანების წინააღმდეგ. გავრცელებული მოსაზრების თანახმად, კაცობრიობა შვიდი მილიარდი გახდა, მათი გამოკვება უკვე უჭირთ და არ აწყობთ, ამიტომ მილიონერებმა და მილიარდერებმა შექმნეს ასეთი იარაღი, რომლითაც უნდათ დედამიწაზე ადამიანების რაოდენობა შეამცირონ.
- მკითხველს რა რჩევებს მისცემდით, რა არის საჭირო იმისთვის, რომ ჯანმრთელი იყოს?
- ადამიანი ჯანმრთელი რომ იყოს, ამისთვის ყველაზე მთავარია: სუფთა წყალი, სუფთა ჰაერი და ნატურალური პროდუქტებით კვება. სხვათა შორის, კორონას დროს წყალიც გასუფთავდა და ჰაერიც, ამიტომ ნათქვამი „ზოგი ჭირი მარგებელიაო“ სწორედ იმას მიესადაგება, რაც ახლა მოხდა...